Qytaıda ShUAR-dy basqarǵan joǵary laýazymdy sheneýniktiń ústinen is qozǵaldy
ASTANA. KAZINFORM – Qytaıdyń Sınhýa agenttigi QKP Ortalyq Komıteti Saıası bıýrosynyń múshesi Ma Sınjýıdyń partııa tártibi pen memleket zańyn óreskel buzdy degen kúdikpen tergeýge alynǵanyn habarlady.
2025 jyldyń shilde aıynda eldiń soltústik-batys aımaǵyndaǵy strategııalyq mańyzy zor Shyńjań-uıǵyr avtonomııalyq regıony Partııa komıtetiniń hatshysy laýazymynan bosatylǵannan beri Ma Sınjýıdyń jańa qyzmeti belgisiz bolyp kelgen edi. Sınhýa agenttigi taratqan aqparatta ol QKP OK Aýyldyq jerler jumysy jónindegi basshylyq toby jetekshisiniń orynbasary dep kórsetilgen.
ShUAR Partııa komıtetin basqaryp turǵanda QKP OK Saıası bıýrosyna engen Ma Sınjýı ókilettik merzimi ortalaı bergende, ótken jyldyń shilde aıynda Beıjińge keri shaqyrylǵan. Sońǵy ret 2025 jyldyń qazan aıynda QKP XX shaqyrylymdaǵy Ortalyq komıtetiniń tórtinshi plenýmynda tóbe kórsetkennen keıin, ol birqatar memlekettik sharalarǵa qatyspaǵan. Onyń isti bolǵany týraly aqparattar sodan beri el qulaǵyn eleńdetip keledi.
Buǵan deıin QKP XX shaqyrylymdaǵy Ortalyq komıteti Saıası bıýrosynyń músheleri He Veıdýn men Chjan ıÝsıanyń ústinen tártiptik is qozǵalǵany belgili. Ma Sınjýı kezekti tsıklde Saıası bıýronyń múshesi qyzmetinde isti bolǵan úshinshi tulǵa jáne ótken otyz jylda ShUAR Partııa komıtetiniń hatshysy qyzmetin atqarǵan Saıası bıýro músheleri arasynan tergeýge alynǵan alǵashqy sheneýnik.
Ashyq derekkózden belgili bolǵandaı, 67 jastaǵy Ma Sınjýı kezinde Qytaıdaǵy jas býyn tehnokrat saıasatkerlerdiń jarqyn ókili retinde belgili bolǵan. Onyń eńbek joly bilim men ǵylym salasynan bastalyp, keıin memlekettik basqarýdyń eń joǵary deńgeıine deıin kóterilgen.
Alǵashqy kezeńde ol ǵarysh salasynda eńbek etti. Shenchjoý baǵdarlamasyna qatysyp, basqarylatyn ǵarysh apparattary boıynsha iri jobalardyń iske asyrylýyna úles qosty.
Keıinirek ǵylymı ortadan óndiristik-áskerı salaǵa aýysyp, Qytaı ǵarysh tehnologııalary korporatsııasynda jetekshi qyzmetter atqardy. 2013 jyldan keıin Ma Sınjýı birjola saıasatqa oıysyp, ortalyq memlekettik organdarda jaýapty qyzmet atqardy. Sol jyly qarasha aıynda eldegi ekonomıkasy eń damyǵan Gýandýn provıntsııasyna jaýapty qyzmetke jiberildi. Qatarynan birneshe jylda Gýandýn provıntsııalyq partııa komıtetiniń hatshysynyń orynbasary, Saıası-zań komıssııasynyń hatshysy, Shenchjen qalalyq partııa komıtetiniń hatshysy jáne Gýandýn provıntsııasynyń gýbernatory qyzmetin atqardy.
2021 jyly jeltoqsan aıynda ol Chen Tsıýangonyń ornyna eldegi eń kúrdeli aımaqtyń biri – Shyńjań-uıǵyr avtonomııalyq regıony Partııa komıtetine hatshy bolyp keldi.
2022 jyly QKP XX sezinde Saıası bıýronyń múshesi bolyp saılandy.
Ma Sınjýı 2023 jyldyń naýryz aıynda Qazaqstanda saparda bolǵan.
Buǵan deıin Qytaıdyń sybaılas jemqorlyqqa qarsy jahandyq naýqandy qaıta bastaǵany týraly jazyp edik.