Qytaıda ShYU «Týrızm jyly 2023» forýmy ótip jatyr
Qytaıdyń Shyńjań-Uıǵyr avtonomııalyq aýdany Úrimshi qalasynda Shanhaı yntymaqtastyq uıymynyń «Týrızm jyly 2023» forýmy ótip jatyr. Oǵan ShYU-ǵa múshe memleketterdiń resmı ókilderi, baqylaýshylary men dıalog boıynsha seriktester, halyqaralyq uıymdardyń ókilderi, týrıstik kompanııalardyń basshylary qatysýda, dep habarlaıdy Kazinform tilshisi.
Forým baǵdarlamasy negizgi tórt taqyryptyq blokqa bólingen. 24 qarasha kúni ótetin «ShYU keńistigindegi týrıstik áleýet» taqyrybyndaǵy plenarlyq otyrys - is-sharanyń basty oqıǵasy bolmaq.
Sondaı-aq baǵdarlamaǵa iskerlik sharalar, sonyń ishinde paneldik sessııalar, týrıstik kompanııalar men bıznes ókilderi arasyndaǵy iskerlik kezdesýler, Shyńjańdaǵy týrıstik oryndarǵa barý kiredi.
Esterińizge sala keteıik, Shanhaı yntymaqtastyq uıymyna múshe memleketter 2023 jyldy ShYU-da Týrızm jyly dep jarııalaǵan bolatyn.
2023 jyldyń shildesinde Qazaqstan Shanhaı yntymaqtastyq uıymyna tóraǵalyq estafetasyn qabyldady.