Qytaıda sheteldik ınvestıtsııasy bar jańa kásiporyndar sany 19,1 paıyzǵa artty

ASTANA. KAZINFORM — 2025 jyly Qytaıda sheteldik ınvestıtsııalardyń qatysýymen barlyǵy 70 392 jańa kásiporyn quryldy, dep habarlaıdy Sınhýa.

Bul kórsetkish 2024 jylmen salystyrǵanda 19,1 paıyzǵa joǵary. Bul týraly juma kúni Qytaı Halyq Respýblıkasynyń Saýda mınıstrligi habarlady.

Vedomstvo deregine sáıkes, ótken jyly Qytaıdyń materıktik bóliginde naqty paıdalanylǵan tikeleı sheteldik ınvestıtsııalar (TShI) kólemi 747,69 mlrd ıýan deńgeıinde tirkeldi (106,92 mlrd AQSh dollary). Atalǵan kórsetkish jyldyq esepte 9,5 paıyzǵa tómendegen.

Salalar boıynsha alǵanda, óńdeý ónerkásibine tartylǵan TShI 185,51 mlrd ıýan boldy, al qyzmet kórsetý salasyna salynǵan ınvestıtsııalar 545,12 mlrd ıýan shamasynda qalyptasty.

Joǵary tehnologııalar sektory 241,77 mlrd ıýan kóleminde tikeleı sheteldik ınvestıtsııa tartty. Sonymen qatar, elektrondyq kommertsııa qyzmetteri salasynda ınvestıtsııalar kólemi jyldyq esepte 75 paıyzǵa, medıtsınalyq quraldar men jabdyqtar óndirisinde 42,1 paıyzǵa, al aeroǵaryshtyq tehnıka men jabdyqtar óndirisi sektorynda 22,9 paıyzǵa ósken.

Investıtsııalardyń elder boıynsha bólinisine kelsek, Shveıtsarııadan kelgen TShI kólemi jyldyq esepte 66,8 paıyzǵa, Birikken Arab Ámirlikterinen — 27,3 paıyzǵa, al Ulybrıtanııadan — 15,9 paıyzǵa artqan.

Budan buryn Brazılııa qytaı azamattary úshin vızasyz rejım engizetinin jazǵan bolatynbyz.