Qytaıda semizdikpen erekshe ádis boıynsha kúrespek

ASTANA. KAZINFORM — Qytaıdyń Tszıansý provıntsııasynda semizdikpen kúreske baǵyttalǵan erekshe áleýmettik bastama qolǵa alyndy. Jergilikti bılik turǵyndarǵa artyq salmaqtan arylǵan jaǵdaıda et ónimderin bermek, dep habarlaıdy South China Morning Post. 

Alǵashqy úsh kúnniń ishinde «saýyqtyrý marafonyna» qatysýǵa 2400-den astam adam ótinish bergen. Joba negizinen jumys isteıtin halyq arasynda salaýatty ómir saltyn nasıhattaýǵa baǵyttalǵan.

Baǵdarlamaǵa medıtsınalyq saqtandyrýy bar nemese óńirdiń áleýmettik saqtandyrý júıesine jarna tóleıtin azamattar qatysa alady. Sonymen qatar úmitkerlerdiń dene salmaǵy ındeksi 23-ten joǵary bolýy tıis. Bel kólemi áıelderde 80 sm-den, al erlerde 90 sm-den asýy qajet.

Qatysýshylardy tirkeý 20 naýryzda aıaqtalady. Odan keıin 23–27 naýryz aralyǵynda bastapqy salmaq ólshenedi. Al qorytyndy nátıje 2027 jyldyń 1–10 qańtary aralyǵynda anyqtalady.

Uıymdastyrýshylar salmaqty ónimge aıyrbastaý shkalasyn da bekitken. Ár 0,5 kg aryqtaǵan adam 0,5 kg sıyr eti nemese 1,5 kg sıyr súıegin ala alady. 1 kg salmaq tastaǵandarǵa 0,5 kg sıyr quıryǵy beriledi. Al 1,5–2 kg aryqtaǵandar sıyrdyń ishek-qarny men tilin alady. Bir qatysýshyǵa beriletin syıaqy eń kóp degende 10 kg tastalǵan salmaqpen shekteledi.

Jergilikti bılik qatysýshylarǵa zııandy aryqtaý tásilderin qoldanýǵa bolmaıtynyn eskertti. Atap aıtqanda, aryqtatatyn dáriler, qustyrý quraldary nemese basqa da qaýipti ádisterge tyıym salynady.

Buǵan deıin Qytaıda halyqtyń ortasha ómir súrý uzaqtyǵyn 80 jasqa deıin arttyrý josparlanyp otyrǵany habarlanǵan.