Qytaıda salmaǵy 10 tonnalyq elektr ushaǵy ekıpajben alǵash ret áýege kóterildi

ASTANA. KAZINFORM – Qytaıda jergilikti mamandar ázirlegen CE-25A elektrli jolaýshylar ushaǵy ekıpajben alǵashqy synaq reısin sátti oryndady. Bul týraly «Sınhýa» habarlaıdy.

Samolet
Foto: Sınhýa

Synaq 14 qarashada Shandýn provıntsııasyndaǵy Bınchjoý qalasynda ótti. Ushaq bortynda eki ushqysh pen synaq ınjeneri boldy. Qytaıdyń kommertsııalyq ushaqtar korporatsııasynyń málimetinshe, ushý shtattyq rejımde ótip, barlyq kórsetkish kútilgen nátıjege sáıkes bolǵan.

CE-25A – kompanııa ázirlegen alǵashqy kommertsııalyq elektr ushaǵy. Ol 19 jolaýshyǵa arnalǵan jáne negizinen qalalar arasyndaǵy baǵyttarda qatynaýǵa beıimdelgen.

Ushaqtyń eń joǵary ushý salmaǵy – 10 tonna. Ol saǵatyna 300 shaqyrymǵa deıingi kreıserlik jyldamdyqpen usha alady. Sondaı-aq 2 400 metr bıiktikke kóterilip, 400 shaqyrymǵa deıingi qashyqtyqty eńserýge qaýqarly.

Buǵan deıin, 2 aqpanda, ushaq ekıpajsyz alǵashqy avtonomdy ushýyn oryndaǵan. Ázirleýshiler osy ýaqytqa deıin barlyǵy 19 ushqyshsyz synaq reısin ótkizgen.

Joba akkýmýlıator óndirýshi CATL kompanııasymen, Shanhaı Tszıao Týn ýnıversıtetimen jáne basqa da seriktestermen birlesip júzege asyryldy.

Qytaıdyń avıatsııa salasyndaǵy ýákiletti organdary jańa modeldi sertıfıkattaýǵa ótinimdi qabyldady.

Buǵan deıin qazaqstandyqtardyń bıyl qysta Mysyrǵa tikeleı reıstermen demalysqa bara alatyny habarlanǵan.

Osyǵan deıin elimizde áýejaılar jańǵyrtylyp, ushaqtar parki jańaratyny týraly jazdyq.