Qytaıda salynyp jatqan týnnel opyrylyp, 3 adam habar-osharsyz ketti
BEIJІŃ. KAZINFORM – Qytaıdyń Tsınhaı provıntsııasy Haıdýn okrýginde salynyp jatqan týnnel opyrylyp, 3 adam habar-osharsyz ketti.
Sınhýa agenttiginiń habarlaýynsha, oqıǵa seısenbi kúni jergilikti ýaqytpen 15:38-de bolǵan.
Salynyp jatqan týnneldiń oń jaq baǵyty opyrylyp, oqıǵa orynynda 3 adam joǵalyp ketken.
Oqıǵadan keıin jergilikti órt sóndirý brıgadasy men medıtsına qyzmetkerleri apat bolǵan jerge jedel baryp, barlaý júrgizip, qutqarý jumystaryn uıymdastyrdy.
Saǵat 21:00-degi jaǵdaı boıynsha jergilikti bılik tótenshe jaǵdaılar, órt sóndirý, qoǵamdyq qaýipsizdik jáne basqa da qutqarý qyzmetiniń 269 qyzmetkerin ornalastyryp, ekskavatorlar, júk tıegishter jáne jedel járdem sııaqty 14 birlik tehnıka jumyldyryp, shamamen 600 tekshe metr aýmaqty tazartty.
