Qytaıda robotty endi robottar qurastyrady
ASTANA. KAZINFORM – Qytaılyq robot tehnıkasyn óndirýshi UBTECH Robotics kompanııasy Lıýchjoý qalasynda ónerkásipke arnalǵan gýmanoıd robottar shyǵaratyn avtomattandyrylǵan zaýytty iske qosty. Kásiporyn jylyna 10 myń robot óndirýge qaýqarly. Bul týraly Beıjińdegi Kazinform tilshisi jergilikti bılikke silteme jasap habarlaıdy.
Qytaıdyń Gýansı-Chjýan avtonomııalyq aýdanynda ornalasqan zaýyt «robottar robottardy óndiredi» qaǵıdaty boıynsha jumys isteıdi. Bul – ónerkásipke arnalǵan adamǵa uqsas robottar shyǵaratyn álemdegi eń alǵashqy iri nysan.
Jobanyń tehnologııalyq seriktesi – Siemens kompanııasynyń bólimshesi. Nemis kontserni óndiristi basqarýǵa arnalǵan tsıfrlyq platformany ázirleýge kómektesti. Ol jetkizý tizbegin úılestirip, bólshekterdi dál qurastyrady jáne óndiristegi jedel logıstıkany basqarady.
Konveıerdiń óndiristik qýaty 10 mınýt saıyn bir robot shyǵarýǵa múmkindik beredi. Zaýytta Walker S serııaly ónerkásiptik jáne Cruzr servıstik robottary shyǵarylady.
Bul ónim Lıýchjoýdyń jergilikti óndirisi men aýyr mashına jasaý salasyn jańǵyrtýǵa baǵyttalǵan. Sonymen qatar taýar Qytaıdyń ishki naryǵyna jáne ASEAN elderine eksporttalady.
Buǵan deıin Qytaıda robottar basqa robottarǵa arnalǵan bólshekter shyǵara bastaǵany habarlanǵan bolatyn.
Aqzat Jıenalına
