Qytaıda robototehnıka nazaryn mehanıkadan basqarý júıelerine aýdara bastady
ASTANA. KAZINFORM – Qytaılyq antropomorfty robot óndirýshileri ózderiniń damý strategııalaryn qaıta baǵdarlaýdy bastap, negizgi nazaryn apparattyq quraldardy jetildirýden ozyq ıntellektýaldy júıelerdi jasaýǵa aýdardy, dep habarlaıdy South China Morning Post.
Habarlanǵandaı, neırojelilik basqarý modelderin ázirleýdegi jetistikter qazir sala tarapynan osy tehnologııalardy naqty kommertsııalyq paıdalanýǵa kóshýdiń negizi retinde qarastyrylyp otyr.
Bul trendti jaqynda Shenchjende ornalasqan Dobot kompanııasynyń tolyq ólshemdi Atom gýmanoıdtarynyń úshinshi partııasyn jetkizý týraly jarııalaǵan keıs rastap otyr. Jańa mashınalardyń basty ereksheligi – «kórý-til-áreket» qaǵıdaty boıynsha jumys istep otyrǵan modeliniń ıntegratsııasy.
Bul arhıtektýra robotqa qatań baǵdarlamalyq jasaqtama algorıtmderin ǵana emes, sonymen qatar naqty óndiristik ortadaǵy belgisizdikke ıkemdi túrde jaýap berýge múmkindik berip otyr. Aldyńǵy býyn robottarynan aıyrmashylyǵy, qazirgi zamanǵy robottar ekijaqty nusqaýlardy túsinedi jáne kontekstke negizdelgen derbes sheshimder qabyldaı bastady.
Dobot kompanııasy qorshaǵan jaǵdaıdy uǵyný arqyly beıimdelý daǵdysy gýmanoıdtardy ónerkásiptik sektorǵa tolyq kólemde engizýdiń bastamasy bolatynyn atap ótti.
Morgan Stanley boljamynsha, 2026 jyl ónerkásip pen kapıtal naryqtarynda «ıntellektýaldy» vektordyń ústemdik etý kezeńi bolady. 2024 jyl prototıpter tusaýkeserleriniń belgisimen erekshelendi, 2025 jyly nazar mehanıka men ótkizgishterdi jetildirýge aýdarylǵan, al qazirgi tsıkl baǵdarlamalyq sheshimderdiń apparattyq quraldarǵa qaraǵanda basymdyǵyn nyǵaıtady.
Buǵan deıin Qytaı álemdegi eń jyldam adam tárizdes robotty tanystyrǵanyn habarladyq.