Qytaıda robot 100 metrge júgirýden álemdik rekord jańartty
ASTANA. KAZINFORM — Qytaıda «Naızaǵaı» atty gýmanoıd robot 100 metr qashyqtyqty 9,32 sekýndta júgirip ótip, álemdik rekord ornatty, dep habarlaıdy Kazinform agenttiginiń Beıjińdegi menshikti tilshisi CGTN-ge silteme jasap.
Rekord 22 tamyzda Gýmanoıd robottardyń ekinshi dúnıejúzilik oıyndary bastalar aldyndaǵy synaq jarysynda tirkeldi. Jarys kezinde robottyń eń joǵary jyldamdyǵy sekýndyna 14,5 metrge jetti.
22-26 tamyz aralyǵynda Qytaı astanasynda ótip jatqan týrnırde «Naızaǵaı» 100, 400 jáne 1500 metr qashyqtyqtarǵa júgirýden de synǵa túsedi. Jalpy, oıyndar baǵdarlamasyna 51 sport túri boıynsha 1 300-den astam jarys engizilgen.
Bıyl jarystar baǵdarlamasyna tuńǵysh ret uzyndyqqa sekirý, aýyr atletıka, arqan tartý jáne ústel tennısi sekildi sport túrleri qosyldy. Oıyndarǵa 16 elden 2 056 robot pen 666 komanda qatysady.
Eske salaıyq, buǵan deıin Beıjińde kespehana aspazy men daıashylaryn tolyqtaı robot almastyrǵanyn jazǵanbyz.
