Qytaıda referendýmǵa arnalǵan daýys berý ýchaskeleri ashyldy
ASTANA. KAZINFORM – Jeksenbi kúni Qytaıda jańa Konstıtýtsııa boıynsha respýblıkalyq referendýmǵa arnalǵan daýys berý ýchaskeleri ashyldy. Olar Qazaqstannyń Beıjińdegi elshiliginde, sondaı-aq Qazaqstannyń Shanhaı, Sıan jáne Gonkong qalalaryndaǵy bas konsýldyqtarynda jumysyn bastady. Bul týraly Qazınform agenttiginiń Beıjińdegi menshikti tilshisi habarlady.
Jergilikti ýaqyt boıynsha tańǵy saǵat 07:00-de qazaqstandyq dıplomattar men saılaý komıssııalarynyń músheleri Qytaıdaǵy daýys berý ýchaskeleriniń ashylý saltanatyn ótkizip, Qazaqstan Respýblıkasynyń memlekettik ánuranyn oryndady.
Qytaıdyń tórt qalasyndaǵy ýchaskelerde daýys berý Astana ýaqyty boıynsha 04:00-den 17:00-ge deıin (jergilikti ýaqyt boıynsha 07:00-den 20:00-ge deıin) ótedi.
Daýystardy sanaý jáne daýys berý nátıjeleri týraly hattamalardy toltyrý ýchaskelik saılaý komıssııalary tarapynan jergilikti ýaqyt boıynsha 20:00-de bastalady.
Daýys berýge Qytaı aýmaǵynda turatyn nemese ýaqytsha júrgen Qazaqstan azamattary qatysa alady. Qytaıdaǵy daýys berý ýchaskeleriniń mekenjaılary Qazaqstan Respýblıkasynyń Syrtqy ister mınıstrliginiń resmı saıtynda jarııalanǵan.
Eske sala ketsek, Ońtústik Koreıa men Japonııadaǵy qazaqstandyqtar referendýmda daýys berýdi bastady.
Sondaı-aq eń alǵashqy daýys berýshi – Japonııada oqıtyn stýdent Jibek Aıdyn bolǵanyn jazdyq.