Qytaıda iri kompanııanyń burynǵy basshysy ólim jazasyna kesildi

ASTANA. KAZINFORM – Qytaıda seısenbi kúni sybaılas jemqorlyq úshin sottalǵan China Huarong International Holdings Limited kompanııasynyń burynǵy bas dırektory Baı Tıanhýeıdi ólim jazasyna kesý úkimi iske asyryldy, dep habarlaıdy China Daily.

Joǵarǵy halyq soty Baı Tıanhýeı 2014 jáne 2018 jyldar aralyǵynda ártúrli basqarýshylyq laýazymdardy atqara otyryp kompanııa bólimshelerine jobalardy satyp alý jáne qarajat jınaýǵa kómektesý úshin laýazymyn teris paıdalanǵanyn anyqtady. Ol óz áreketteri úshin jalpy somasy 1,1 mlrd ıýannan (156 mln AQSh dollary) asatyn para alǵan.

Ólim jazasyn Tıantszın qalasynyń №2 orta deńgeıli Halyq soty júzege asyrdy, onda Baı para alǵany úshin kináli dep tanyldy. Sot oǵan Joǵarǵy sottyń sheshimi týraly habarlap, ólim jazasy úkimin iske asyrylmas buryn otbasy múshelerimen kezdesýine ruqsat berdi.

Qytaıda tómengi deńgeıli sottar shyǵarǵan ólim jazasy Joǵarǵy halyq sotynyń mindetti túrde qaıta qaraýyna jatady. Ólim jazasy ol bekitkennen keıin ǵana oryndalady.

Baı Tıanhýeıdiń isi China Huarong Asset Management kompanııasynyń burynǵy tóraǵasy Laı Sıaomınniń sotynan bergi eń tanymal isterdiń birine aınaldy. Laı 2021 jyly 1,78 mlrd ıýannan astam para alǵany úshin kináli dep tanylǵannan keıin ólim jazasyna kesildi.

Buǵan deıin Qytaıdyń burynǵy sport mınıstri sybaılas jemqorlyq úshin ólim jazasyna kesilgenin jazǵan bolatynbyz.