Qytaıda pyshaqpen jasalǵan shabýyldan japondyq bala zardap shekti, japon úkimeti alańdaýshylyq bildirdi
ASTANA. KAZINFORM – Japondyq Nıkkeı aqparat agenttiginiń habarlaýynsha, 18 qyrkúıekte Qytaıdyń Gýandýn provıntsııasynyń Shenchjen qalasyndaǵy «japon mektebinde» oqıtyn japondyq balaǵa belgisiz qytaılyq er adam shabýyl jasaǵan.
Bul týraly Japonııa mınıstrler kabıneti bas hatshysynyń orynbasary Hırosı Morııa baspasóz máslıhatynda málimdedi. Tıisti aqparatqa sáıkes, shabýylǵa ushyraǵan bala (ul, bastaýysh synyp oqýshysy) oqıǵa bolǵan kezde mektepke jalǵyz kele jatqan.
Qytaıdyń Shenchjen qalalyq polıtsııasy taratqan aqparatqa qaraǵanda, shabýyldy jasaǵan adam Qytaı azamaty, 44 jastaǵy er adam bolǵan. Shabýylshy pyshaq qoldanǵan. Polıtsııa shabýyl jasaǵan adamdy ustap, jaraqat alǵan balany aýrýhanaǵa jiberdi.
«Japon azamattaryn qorǵaý turǵysynan biz jergilikti úkimetke osyndaı oqıǵalardyń qaıtalanýyn boldyrmaý jáne egjeı-tegjeıli aqparatpen bólisý týraly ótinish jasadyq», - dedi Japonııa Mınıstrler kabıneti Bas hatshysynyń orynbasary Hırosı Morııa.
Bul bıyl Qytaıda japondarǵa jasalǵan alǵashqy shabýyl emes. 2024 jyldyń maýsymynda osyndaı shabýyl Tszıansý provıntsııasynyń Sýchjoý qalasynda boldy. Sol kezde belgisiz qytaılyq er adam pyshaqpen mektep avtobýsyn kútip turǵan japondyq ana men balany jaraqattap, shabýyldy toqtatýǵa tyrysqan taǵy bir qytaılyq áıeldi óltirgen.
Qytaıdaǵy japon mektepteri – Qytaıdaǵy tıisti ishki zańdar men erejelerge sáıkes Qytaıdaǵy japon azamattarynyń balalaryna bilim berý úshin qurylǵan mektepter. Qytaıdaǵy Japonııa elshiliginiń statıstıkasyna sáıkes, Qytaıdyń 9 qalasynda 11 japon mektebi bar, 2024 jyldyń 15 sáýirindegi jaǵdaı boıynsha mektepterde 3 305 japondyq oqýshy oqıdy.
Bul mektepterdegi oqýshylarǵa shabýyl jalǵasyp jatqanyn eskere otyryp, Japonııa úkimeti Qytaıdaǵy japon mektepterin qosymsha qaýipsizdik qyzmetkerlerimen qamtamasyz etý úshin qarjy bólýdi josparlap otyr.
