Qytaıda pırotehnıkalyq ónimderdiń qaýipsizdigine baqylaý kúsheıtiledi
ASTANA. KAZINFORM — QHR Tótenshe jaǵdaılardy basqarý mınıstrligi pırotehnıkalyq buıymdardyń qaýipsizdigin qatań baqylaý úshin arnaıy tekserý toptaryn jiberedi. Bul týraly vedomstvo habarlady, dep jazady Sınhýa.
Sársenbi kúni Tótenshe jaǵdaılardy basqarý mınıstrligi men QHR Memlekettik keńesi janyndaǵy Óndiristegi qaýipsizdikti qamtamasyz etý komıtetiniń keńsesi birlesken otyrys ótkizdi. Jıynda pırotehnıkalyq ónimderdi óndirý, tasymaldaý, satý jáne paıdalaný kezeńderiniń barlyǵynda baqylaýdy kúsheıtý, sondaı-aq halyqtyń qaýipsizdik máseleleri boıynsha habardarlyǵyn arttyrý qajettigi aıtyldy.
Kóktem merekesi (Qytaı Jańa jyly) men Shamdar festıvali kezinde otshashý men petardalardy qoldaný sharyqtaý shegine jetedi. Bul kezeńde qaýipsizdik táýekeli de arta túsedi. Osyǵan baılanysty jergilikti bılikke bólshek saýda oryndary men dúkenderde qaýipsizdik talaptarynyń saqtalýyn tekserip, qaýiptiń aldyn alý tapsyryldy.
Qoımada taýardy shamadan tys jınaqtaý nemese dúken syrtynda satý sııaqty qaýipti áreketterdiń jolyn kesý qajet ekeni atap ótildi. Sondaı-aq dúken ishinde temeki shegýge jáne ashyq ot paıdalanýǵa qatań tyıym salynatyny eskertildi.
Budan bólek, paıdalanylmaı turǵan ǵımarattar men qoımalarda pırotehnıkalyq ónimderdiń zańsyz saqtalýyn boldyrmaý úshin kúsheıtilgen tekserýler júrgiziledi.
Eske salsaq, Qytaıda pırotehnıkalyq buıymdar dúkeninde jarylys bolyp, 12 adam kóz jumǵany habarlandy.