Qytaıda pırotehnıkalyq buıymdar dúkeninde jarylys bolyp, 12 adam kóz jumdy
ASTANA. KAZINFORM — Jergilikti ýaqyt boıynsha 18 aqpan kúni 14:00 shamasynda Qytaıdyń Hýbeı provıntsııasynyń Sıanıan qalalyq okrýgine qarasty Ichen ýeziniń Chjentszı kentindegi pırotehnıkalyq ónimder satatyn dúkenderdiń birinde jarylys boldy, dep habarlaıdy Sınhýa.
Aldyn ala boljam boıynsha, oqıǵa saldarynan 12 adam qaza tapqan.
Agenttiktiń jazýynsha, oqıǵadan keıin Qytaıdyń Tótenshe jaǵdaılar mınıstrligi qutqarý jumystaryn ǵylymı negizde uıymdastyrý, jaralanǵandarǵa jedel medıtsınalyq kómek kórsetý, adam shyǵynyn múmkindiginshe azaıtý týraly tapsyrma bergen.
Qytaı Memlekettik keńesiniń janyndaǵy Óndiristik qaýipsizdik komıteti men Tótenshe jaǵdaılar mınıstrliginiń oqıǵa ornyna arnaıy jumys tobyn jibergeni belgili boldy. Aqparatqa sáıkes, jumys toby qutqarý sharalaryn úılestirý jáne apattyń sebebin anyqtaý jumysyn baqylaýǵa almaq.
NetEase saıtynyń málimetinshe, áleýmettik jelide tarap júrgen beınejazbadan belgili bolǵandaı, jarylys tórt qabatty ǵımarattyń birinshi qabatyndaǵy dúkende bolǵan.
Jarylystan keıin qyzyl jalyn jyldam órship, oqıǵa ornyn qoıý qara tútin basqan, jedel járdem kóligi men órt sóndirý tehnıkalary jarylys bolǵan aýmaqqa sýyt jetken.
Beınejazbadan sondaı-aq polıtsııa qyzmetkerleriniń dúken mańyn oqshaýlap, kólik qozǵalysyna shekteý qoıyp, qutqarýshylarǵa jol ashyp jatqany baıqalady.
Búgingi kúnde Qytaı jurtshylyǵy dástúrli jańa jyl — Kóktem merekesin toılap jatyr. Osyǵan baılanysty otshashýdy paıdalaný erejelerin saqtamaýdan týyndaıtyn oqys oqıǵalar kóbeıgen. 15 aqpan kúni Lıanıýngan qalasynyń Dýnhaı ýeziniń Dýnan aýylyndaǵy pırotehnıkalyq buıymdar dúkeninde de jarylys bolyp, saldarynan 8 adam kóz jumǵan, 2 adam jaraqat alǵan bolatyn.
Tergeýden anyqtalǵandaı, Lıanıýngandaǵy jarylysqa satyp alýshynyń otshashýdy dúken aldynda synaqtan ótkizýi sebep bolǵan. Jerge shanshylǵan otshashý jeldiń áserinen qısaıyp, shashyraǵan ushqyn dúkendegi taýarǵa kelip túsken, onyń sońy tizbekti jarylysqa ulasqan.
Buǵan deıin qytaılyqtardyń kóktem merekesin toılap jatqany týraly jazyp edik.