Qytaıda Parkınson aýrýyn erte anyqtaıtyn JI skrınıngi ázirlendi
ASTANA. KAZINFORM — Shanhaı Tszıaotýn ýnıversıtetiniń ǵalymdary Qytaıdaǵy egde jastaǵy adamdardyń sóıleý qabiletiniń buzylýyn anyqtaıtyn alǵashqy ıntellektýaldy jyldam skrınıngtik júıeni tanystyrdy, dep habarlaıdy TV BRICS.
Júıe — nevrologııalyq jáne kognıtıvti aýrýlardy, sonyń ishinde Parkınson aýrýy, dementsııa jáne ınsýlttiń saldaryn erte kezeńde anyqtaıdy.
Chan Hýeı bastaǵan top patologııalyq lıngvıstıka jáne tildik testileý salasyndaǵy jetistikterdi paıdalandy. Ǵalymdar tapsyrmalar men baǵalaý júıesin qamtıtyn platforma qurdy. Qatysýshylar aýdıo materıaldar boıynsha suraqtarǵa jaýap berip, usynylǵan sýretterdi sıpattaýy kerek. Test shamamen 7 mınýt ýaqytty alady, sodan keıin nátıjeni shyǵaryp beredi.
Ǵalymdardyń bul jumysy medıtsınalyq mekemelerde, qarttarǵa arnalǵan ortalyqtar men qarttar úılerinde ádettegi josparly tekserý kezinde qoljetimdi. Sondaı-aq ony ár otbasyndaǵylar paıdalana alady. Testileýdi smartfonnan, planshetten nemese kompıýterden ótýge bolady. Bul júıe qazir Qytaıdaǵy aýrýhanalarda pılottyq joba retinde engizilgen.
Normatıvtik bazany jasaý úshin ǵalymdar 50 men 79 jas aralyǵyndaǵy myńnan astam turǵynnyń deregin jınaqtaǵan. Testtik taldaýda jasy, bilimi, tanymdyq erekshelikteri, jynysy, kásibi jáne dıalektisi eskerildi.
Chan Hýeıdiń aıtýynsha, aldaǵy ýaqytta paıdalanýshylar testtiń birneshe túrinen ótýi úshin suraqtar bazasyn keńeıtý josparlanǵan.
Osyǵan deıin elimizde múgedektik dárejesin anyqtaý úshin jasandy ıntellekt qoldanylýy múmkin ekenin jazǵan bolatynbyz.