Qytaıda ótken qysqy spartakıadada qazaq qyzy chempıon atandy
ALTAI.KAZINFORM – QHR Іshki Mońǵol avtonomııalyq ólkesi Ulanchab qalasynda ótip jatqan XIV kezekti Ulttyq qysqy oıyndarynda qandasymyz jeńis tuǵyrynan kórindi.
«Jenmın ýań» (people.cn) saıtynyń habarlaýynsha, qandasymyz Baıan Jalynqyzy shańǵy jarysynda bir altyn bir qola medal jeńip aldy.
Naqtyraq aıtsaq, Baıan áıelder arasynda Qysqa qashyqtyqtaǵy komandalyq sprınt baǵdarlamasynda chempıon atandy. Bul Shyńjań komandasynyń 2017 jyldan beri shańǵy sportynan alǵan alǵashqy altyn medali.
Sondaı-aq, ol osyǵan deıin 10 km erkin syrǵanaý baǵdarlamasynda qola júlde enshilegen edi.
Aıta keterligi, taǵy bir qandasymyz Jáınat áıelder arasynda snoýbordtan kedergilerdi qýý baǵdarlamasynda qola medal jeńip aldy.
Baıan Jalynqyzy QHR Altaı aımaǵy, Jemeneı aýdanynda dúnıege kelgen. Ol Shańǵy sporty túrleri boıynsha Qytaı ulttyq quramasyna qabyldanyp, Beıjiń qysqy Olımpıadasynda óner kórsetti.
