Qytaıda otandyq júıemen jabdyqtalǵan kompıýter shyǵaryldy

ASTANA. KAZINFORM – Otandyq HarmonyOS operatsııalyq júıesimen jasaqtalǵan «Hýnmen» kompıýteriniń tanystyrylymy 8 sáýir kúni Shenchjen qalasynda ótti. 

Lianhe Zaobao basylymynyń jazýynsha, bul — Qytaıdyń otandyq operatsııalyq júıeni jeke kompıýter óndirisine qoldaný boıynsha qol jetkizgen mańyzdy jetistigi.

Belgili bolǵandaı, «Hýnmen» kompıýterin shyǵarýǵa Huawei kompanııasy bes jyl boıy daıyndaldy. Jobaǵa on myńnan astam ınjener, 20-dan astam ǵylymı-zertteý ınstıtýty jumyldyrylǵan, 2700-den astam patent alynyp, operatsııalyq júıe túbegeıli qaıta jasalǵan.

Resmı derek boıynsha, HarmonyOS — «barlyq stsenarııge arnalǵan» smart operatsııalyq júıe. Usynylyp otyrǵan «Hýnmen» kompıýteri 19 mamyrda satylymǵa shyǵady. Buǵan deıingi Huawei kompıýterlerinen ereksheligi — jańa qurylǵy Linux ústeldik júıesine emes, tolyǵymen Harmony ıadrosyna negizdelgen.

Sonymen qatar, jańa kompıýterge jasandy ıntellekt (AI) pen ıntellektýaldy ózara áreket fýnktsııalary engizilgen. Qazirgi ýaqytta 300-den astam ekojúıelik qosymsha HarmonyOS júıesine beıimdelip úlgerdi, al jyl sońyna deıin bul san 2000-nan asyp jyǵylýy múmkin.

HarmonyOS júıesi alǵash ret 2021 jyly smartfondarǵa ornatylǵan bolatyn.

Alaıda, Huawei ınternet-dúkeniniń tutynýshylarǵa qyzmet kórsetý ortalyǵynyń málimetinshe, eski úlgidegi jáne qazirgi kezde satylymda bar Huawei noýtbýkteri, ústeldik jáne monoblok kompıýterleri «Hýnmen» qurylǵysynda qoldanylatyn HarmonyOS 5 nusqasyn ornatýǵa nemese jańartýǵa jaramaıdy.

Buǵan deıin Huawei seriktesteriniń 2025 jylǵy konferentsııasy Almatyda ótkeni týraly habaolaǵan edik.