Qytaıda oqý: qazaqstandyq talapkerlerge 73 bilim granty beriledi

ASTANA. KAZINFORM — Qytaıdyń joǵary oqý oryndaryna qujat qabyldaý bastaldy, dep habarlaıdy «Halyqaralyq baǵdarlamalar ortalyǵy» AQ baspasóz qyzmeti.

Qazaqstan Respýblıkasynyń Bilim jáne ǵylym mınıstrligi men Qytaı Halyq Respýblıkasynyń Bilim mınıstrligi arasyndaǵy 2003 jylǵy 3 maýsymdaǵy bilim berý salasyndaǵy yntymaqtastyq týraly kelisimge sáıkes, Qytaı úkimeti 2026–2027 oqý jylyna QHR memlekettik stıpendııasy boıynsha oqýǵa 73 bilim grantyn usynady.

Atalǵan granttar kelesi bilim berý baǵdarlamalary boıynsha bólingen.

— bakalavrıat;

— magıstratýra;

— doktorantýra.

Grant myna shyǵyndy óteıdi:

— tegin oqý;

— aı saıynǵy stıpendııa;

— medıtsınalyq saqtandyrý;

— jataqhanada turý.

— Qalǵan shyǵyndy grant ıegeri ózi tóleıdi. Konkýrstyq irikteýge qatysý úshin úmitkerler Qytaı stıpendııalyq keńesi saıtynda onlaın tirkeýden ótý tıis. 2026 jyldan bastap QHR-dyń joǵary oqý oryndarynda bakalavr dárejesin alýǵa úmitker barlyq sheteldik talapker sheteldik stýdentterge arnalǵan akademııalyq daıyndyq testinen (CSCA) ótýge mindetti. Qujattardy qabyldaý kezeńinde akademııalyq daıyndyq testinen (CSCA) ótý jáne onyń nátıjelerin usyný talap etilmeıdi, kórsetilgen test konkýrstyq irikteýden ótkennen keıin tapsyrylady. CSCA testileýi týraly tolyq aqparat www.csca.cn resmı saıtynda ornalastyrylǵan, — delingen habarlamada.

Qujat 2026 jylǵy 21 qańtardan bastap 10 aqpandy qosa alǵanda «Elektrondyq úkimet» (Egov.kz) portaly nemese «Halyqaralyq baǵdarlamalar ortalyǵy» AQ arqyly qolma — qol qabyldanady. Tolyq aqparat resmı saıtta ornalastyrylǵan.