Qytaıda kitap oqıtyn adamdardyń úlesi 82,3%-ǵa jetti
ASTANA. KAZINFORM – Tsıfrlyq oqýǵa degen úrdis kúsheıip kele jatqan jaǵdaıda, Qytaıda oqyrman halyqtyń jalpy úlesi 2025 jyly 82,3 paıyzǵa jetti. Bul kórsetkishter dúısenbi kúni jarııalanǵan jalpyulttyq saýalnama nátıjesinde belgili boldy, dep habarlaıdy Sınhýa.
Atalǵan kórsetkish 2024 jylmen salystyrǵanda 0,2 paıyzdyq tarmaqqa ósken. Bul Qytaıdyń elde «oqıtyn qoǵam» qalyptastyrý baǵytyndaǵy kúsh-jigerin aıqyndaıdy.
Saýalnamany Qytaıdyń baspasóz jáne basylymdar akademııasy júrgizip, onyń nátıjeleri Nanchan qalasynda (Qytaıdyń shyǵysyndaǵy Tszıansı provıntsııasynyń ákimshilik ortalyǵy) ótken halyq arasynda oqýdy nasıhattaý jónindegi 5-konferentsııada jarııalandy.
Saýalnamaǵa sáıkes, 2025 jyly Qytaıdyń eresek azamattary qaǵaz jáne elektrondy formatty qosa alǵanda orta eseppen 8,39 kitap oqyǵan. Al tsıfrlyq oqýǵa arnalǵan shyǵarmalardyń jalpy sany 70 mıllıon ataýdan asty.
Sondaı-aq zertteý nátıjesi ótken jyly Qytaı eresekteriniń 80,8 paıyzy tsıfrlyq oqýmen aınalysqanyn kórsetti. Aýdıokitaptar men kitaptarǵa arnalǵan beıneretsenzııalarǵa qyzyǵýshylyq ta artqan: 2024 jyly bul kórsetkishter tıisinshe 38,5 jáne 5,7 paıyz bolsa, 2025 jyly 38,7 jáne 6,3 paıyzǵa jetken.
Joǵary suranys naryqtyń damýyna serpin berdi. Saýalnamaǵa sáıkes, Qytaıdyń jappaı tsıfrlyq oqý naryǵy sońǵy bes jylda eki esege jýyq ósip, 30,25 mlrd ıýannan (shamamen 4,4 mlrd AQSh dollary) 59,48 mlrd ıýanǵa deıin ulǵaıǵan.
Soǵan qaramastan, qaǵaz kitaptar óz tartymdylyǵyn saqtap otyr: Qytaı eresekteriniń 45,9 paıyzy áli de osy formatty basqa oqý túrlerinen joǵary qoıady. Al mazmun jaǵynan kórkem ádebıet erekshe suranysqa ıe bolǵan.
Bul qoǵamnyń tsıfrlyq oqýdyń yńǵaılylyǵyn paıdalanǵanymen, tereń oıǵa boılaý, júıeli bilim alý jáne rýhanı baıýǵa degen qajettiliginiń tómendemegenin kórsetedi.
Qytaı baspagerler qaýymdastyǵynyń tóraǵasy Ý Shýlın tsıfrlyq dáýirde tereń oqý jeke damý, kásibı jetistik jáne adamgershilik tárbıeniń negizi bolyp qala beretinin aıtty.
Ol tsıfrlyq oqýdy durys baǵyttaýdy kúsheıtip, oqyrmandardy «úzik-úzik qaraýdan» «tereń oqýǵa» kóshýge yntalandyrý arqyly tereń oqý mádenıetin qalyptastyrýǵa shaqyrdy.
Aıta ketelik Búgin el kitaphanalarynda «Kitaphana túni» aktsııasy ótedi.
