Qytaıda «Noýl» taıfýnyna baılanysty eń joǵary qaýip deńgeıi jarııalandy
ASTANA. KAZINFORM — Qytaı bıligi «Noýl» taıfýnynyń jaqyndaýyna baılanysty qyzyl deńgeıdegi eskertý jarııalady, dep habarlaıdy Sınhýa.
Sınoptıkterdiń boljamynsha, tabıǵı apat ońtústiktegi Gýandýn provıntsııasynyń jaǵalaýyna jetip, odan ári kúsheıe túsedi.
Qytaıdyń Ulttyq meteorologııalyq ortalyǵynyń málimetinshe, «Noýl» — bıylǵy maýsymdaǵy 12-taıfýn.
Senbi kúni keshke taıfýnnyń ortalyǵy Hýeıchjoý qalasynyń Hýeıdýn ýezinen ońtústik-shyǵysqa qaraı shamamen 100 shaqyrym jerde bolǵan. Onyń ortalyǵyna jaqyn aımaqta jeldiń jyldamdyǵy 14 balǵa jetken.
Sınoptıkter tsıklon soltústik-batys baǵytta saǵatyna shamamen 20 shaqyrym jyldamdyqpen qozǵalyp, kúshin arttyra beretinin boljady. Qurlyqqa shyqqannan keıin taıfýn baǵytyn soltústik-soltústik-batysqa ózgertip, birtindep baıaýlaı bastaıdy.
Taıfýn qaýpine baılanysty Memlekettik sý tasqyny men qurǵaqshylyqqa qarsy kúres shtaby Gýandýn provıntsııasynda sý tasqyny men taıfýndarǵa baılanysty tótenshe jaǵdaıǵa daıyndyq deńgeıin úshinshi deńgeıge kóterdi. Al Tszıansı jáne Hýnan provıntsııalarynda yqtımal sý tasqynyna baılanysty tórtinshi deńgeıli daıyndyq engizildi.
Qytaıda taıfýnǵa qatysty eskertýdiń 4 deńgeıli júıesi qoldanylady. Qyzyl deńgeı — qaýiptiń eń joǵary dárejesin bildiredi. Odan keıin qaýip deńgeıine qaraı qyzǵylt sary, sary jáne kók sıgnaldar belgilenedi.
Aıta keteıik, Qytaı taıfýn men sý tasqynynyń saldaryn joıýǵa 430 mıllıon ıýan bóldi.
