Qytaıda nóser jaýynǵa jáne taý tasqyndaryna qatysty eskertý jarııalandy

ASTANA. KAZINFORM – Qytaıdyń Ulttyq meteorologııalyq ortalyǵy jeksenbi, 17 tamyz kúni nóser jaýynǵa baılanysty «kók» deńgeıdegi eskertý merzimin uzartty. Sınoptıkterdiń boljamynsha, kúshti jaýyn-shashyn eldiń kóptegen óńirin qamtıdy, dep habarlaıdy Sınhýa.

Ortalyq dereginshe, jeksenbi kúni saǵat 08:00-den dúısenbi kúni 08:00-ge deıin Shansı, Hebeı, Shandýn, Tsınhaı, Gýandýn provıntsııalarynda, Іshki Mońǵolııa avtonomııalyq aýdanynda jáne Gýansı-Chjýan avtonomııalyq aýdanynda nóser jaýyn kútiledi.

– Atalǵan óńirlerdiń keı jerlerinde saǵatyna 70 mıllımetrden astam jaýyn-shashyn túsip, ol naızaǵaımen jáne ekpindi jelmen qatar júrýi múmkin, – delingen ortalyq habarlamasynda.

Vedomstvo qaýipsizdik sharalaryn da jarııalady. Jergilikti bılikke nóserge daıyn bolý, mektepter men balabaqshalarǵa oqýshylardyń qaýipsizdigin qamtamasyz etý, júrgizýshilerge sý basqan joldarda saq bolý, keptelisterge nazar aýdarý eskertildi. Sonymen qatar NMTs ýákiletti mekemelerge qalalardaǵy káriz júıesin, balyq ósiretin toǵandardy jáne egistik alqaptardaǵy drenaj júıesin tekserýdi tapsyrdy.

Qytaıda qolaısyz aýa raıyna eskertý júıesi tórt deńgeıden turady. Eń joǵarǵy deńgeı – qyzyl túspen, odan keıingisi – qyzǵylt sary, sary jáne eń tómengisi kók túspen belgilenedi.

Aıta keteıik, nóser jaýyn saldarynan Pákistan men Úndistanda da sý tasqyny bolyp, zardap shekkender bar. Pákistannyń soltústiginde qaza tapqandar sany 330-ǵa jetti, Úndistannyń Kashmır aımaǵynda 60 adam qaza tapty. Sondaı-aq Nıgerde nóser saldarynan 23 adamnyń ómiri qıyldy.