Qytaıda nóser jaýynǵa baılanysty «kók» deńgeıdegi eskertý uzartyldy

ASTANA. KAZINFORM — Qytaıdyń Ulttyq meteorologııalyq ortalyǵy senbi kúni eldiń keıbir óńirinde jalǵasyp jatqan qatty jaýyn-shashynǵa baılanysty «kók» deńgeıdegi eskertý sharalarynyń merzimin uzartty, dep habarlaıdy Sınhýa.

Meteorologtardyń boljamy boıynsha senbi kúni tańǵy 08:00-den jeksenbi kúni tańǵy 08:00-ge deıin Hebeı, Shandýn, Henan, Tszıansý, Anhoı, Hýbeı, Hýnan, Chjetszıan, ıÝnnan, Gýandýn, Heılýntszıan provıntsııalarynda jáne Gýansı-Chjýan avtonomııalyq aýdanynda qatty jaýyn jaýady dep kútilip otyr.

Mamandar atap ótkendeı, Tszıansý provıntsııasynyń soltústiginde táýliktik jaýyn-shashyn mólsheri 150 mm-den asyp ketýi múmkin.

Ulttyq meteorologııalyq ortalyq jergilikti bılik organdaryna nóser jaýynǵa daıyn bolýdy jáne qala aýdandary men aýyl sharýashylyǵy jerlerinde sýdy aǵyzý boıynsha tıisti sharalardy qabyldaýdy usyndy.

Aıta keteıik, Qytaıda qoldanystaǵy aýa raıyna baılanysty eskertý júıesi tórt deńgeıden turady: eń joǵary qaýip – qyzyl tús, odan keıingi deńgeıler – qyzǵylt sary, sary jáne kók.

Eske salyp ótsek, qatty jáne tolassyz jaýǵan jańbyr men ózenderdiń joǵarǵy aǵysynan kelgen sý kóleminiń artýy saldarynan Qytaıdyń ońtústik-batysyndaǵy Gýıchjoý provıntsııasynyń eki ýezinde kúshti sý tasqyny boldy. Seısenbi kúni saǵat 14:30–daǵy málimet boıynsha Jýntszıan jáne Tsýntszıan ýezderinde tıisinshe 48 900 jáne 32 000 adam ýaqytsha evakýatsııalandy.

Qytaı bıligi sý tasqynynan zardap shekken Gýıchjoý provıntsııasyna 100 mln ıýan bólgeni belgili boldy.

Eki kún buryn Gýıchjoý provıntsııasynda tasjol kópiri qulap, júk kóliginiń júrgizýshisi qıraǵan kópirde ilýli turǵan kólik kabınasynda qalyp qoıǵanyn habarlaǵan edik.

Keıinnen tabıǵı apat saldarynan alty adamnyń qaza bolǵany anyqtaldy.