Qytaıda nóser jańbyrdan eldimekendi sý basty
Qatty nóser jańbyr saldarynan Qytaıdyń ortalyq bóligindegi Hýbeı provıntsııasynyń Lýngan kentin sý basty, dep habarlaıdy Kazinform agenttiginiń Beıjińdegi menshikti tilshisi.
Jergilikti aqparatqa sáıkes, eki kún ishinde óńirde orta eseppen 160 mıllımetrge deıin jaýyn-shashyn túsken. Nóser jańbyr men kórshiles aýdandardan kelgen tasqyn sýlardyń áserinen Lýngan ózenindegi sý deńgeıi 4,62 metrge kóterildi. Sonyń saldarynan kent kóshelerin sý basyp, júzdegen turǵyn óz úılerinde qamalyp qalǵan.
— Nóser jańbyr búkil kentti sý astynda qaldyrdy, joldardyń barlyǵyn sý basty. Asa qajettilik bolmasa, syrtqa shyqpańyzdar, ózderińizdi saqtańyzdar! Tabıǵat apaty aıaýshylyq tanytpaıdy, biraq adamdardyń janashyrlyǵy mol. Sý tezirek qaıtyp, úıler aman qalyp, barlyǵy qaýipsiz bolsa eken, — dep jazdy Qytaıdyń Rednote áleýmettik jelisindegi qoldanýshylardyń biri.
Qaýipti aımaqtardan qutqarý qyzmetteri jedel túrde 1350 adamdy evakýatsııalady. Resmı málimet boıynsha, qaza tapqandar men zardap shekkender joq.
Qazirgi ýaqytta tótenshe jaǵdaılar qyzmetteri men jergilikti turǵyndardyń kúshimen turǵyn aýdandardaǵy sý negizinen shyǵarylǵan. Sý basqan aýmaqtarda qalpyna keltirý jumystary júrgizilip jatyr.
Buǵan deıin Qytaıdyń ońtústigindegi Gýandýn provıntsııasynda nóser jańbyr men sý tasqyny qaýpine baılanysty 36 myńnan astam turǵynnyń evakýatsııalanǵany habarlanǵan bolatyn.
