Qytaıda nóser men aptapqa baılanysty «sary» deńgeıli eskertý jarııalandy

ASTANA. KAZINFORM — Qytaı Halyq Respýblıkasynyń Ulttyq meteorologııalyq ortalyǵy (UMO) senbi kúni eldiń birqatar aımaǵynda nóser jaýyn men aptap ystyqqa baılanysty «sary» deńgeıdegi dabyl jarııalady.

UMO málimetinshe, senbi kúni saǵat 08:00–den jeksenbi kúni saǵat 08:00–ge deıin Іshki Mońǵolııa avtonomııalyq aýdany, Heılýntszıan, Tszılın, Lıaonın, Hebeı provıntsııalary, Beıjiń qalasy jáne basqa óńirlerde qatty jańbyr jaýýy múmkin.

Atap aıtqanda, Іshki Mońǵolııa ARA, Heılýntszıan, Tszıansý jáne basqa da óńirlerde jaýyn-shashyn kólemi 150 mm-ge deıin jetýi yqtımal. Keıbir aımaqtarda bir saǵat ishinde 70 mm-den astam jaýyn jaýýy múmkin.

Osyǵan baılanysty UMO jergilikti bılik organdary men tıisti vedomstvolarǵa nóserge daıyn bolýdy usyndy. Mektepter men balabaqshalar oqýshylardyń qaýipsizdigin qamtamasyz etý sharalaryn qabyldaýy tıis, al júrgizýshilerge tasqyn men jol keptelisterine baılanysty barynsha saq bolý usynyldy.

UMO boljamynsha, senbi kúni Qytaıdyń kóptegen óńirinde aýa temperatýrasy 35-39 gradýsqa deıin kóteriledi.

Atap aıtqanda, Shensı, Sychýan provıntsııalarynda, Chýntsın qalasy men Shyńjań-Uıǵyr avtonomııalyq aýdanynyń Týrfan shuńqyrynda synap baǵanasy 40 gradýstan da asyp túsýi múmkin.

UMO turǵyndarǵa, ásirese tústen keıin ashyq aýada belsendi áreketten aýlaq bolýǵa keńes aıtty. Sondaı-aq, balalar men qarttar sekildi osal toptardy qorǵaý úshin qajetti saqtyq sharalaryn qabyldaýǵa shaqyrdy.

Eske sala keteıik, Qytaıda qolaısyz aýa raıyna qatysty tórt deńgeıli eskertý júıesi engizilgen: eń joǵary qaýip deńgeıi — qyzyl tús, odan keıin — qyzǵylt sary, sary jáne kók túster.

Aıta ketelik Qytaı astanasynda sý tasqynynan qaza tapqandar sany 44-ke jetti.