Qytaıda neke qııý kórsetkishi taǵy da quldyrady

ASTANA. KAZINFORM - Qytaıdyń azamattyq ister mınıstrligi «Azamattyq ákimshilik boıynsha 2024 jyldyń tórt toqsanyndaǵy statıstıkalyq derekter esebin» jarııalady, dep habarlaıdy The Paper jańalyqtar portaly. 

Mınıstrliktiń málimetinshe, 2024 jyly Qytaıda 6 106 000 jup nekege tirkelip, 2 621 000 jup ajyrasý týraly kýálik alǵan. 

The Paper keltirgen derekterge sáıkes, 2023 jyly Qytaıda 7 680 000 jup neke qıyp, 2 593 000 jup ajyrasqan bolatyn. Demek, 2024 jyly tirkelgen neke sany 20,5%-ǵa azaısa, ajyrasqandardyń sany 1,1%-ǵa kóbeıgen. 

Sıngapýrlyq «Lianhe Zaobao» basylymynyń málimetinshe, Qytaıda neke qııý kórsetkishi 2014 jyldan keıin jyl sanap azaıyp, 2023 jyly ǵana bolmashy serpilis kórsetken bolatyn. 

Basylymnyń atap ótýinshe, qytaılyq táýelsiz demograf He ıAfý ótken jyldyń qarasha aıynda 2023 jyly neke qııý kórsetkishiniń 2022 jylmen salystyrǵanda qaıta kóterilýiniń sebebi jaıly WeChat áleýmettik jelisi arqyly pikir bildirgen. Onyń aıtýynsha, bul qubylysqa 2020-2022 jyldary COVID-19 pandemııasynyń saldarynan kóptegen bolashaq jubaıdyń úılený josparyn keıinge qaldyrýy sebep bolǵan.

Basylymnyń jazýynsha, Qytaı ekonomıkasyndaǵy belgisizdik pen el boıynsha turmys qunynyń úzdiksiz ósýi jastardy úılený isin keıinge shegerýge májbúr etip otyr.