Qytaıda Mıanmadan ekstradıtsııalanǵan 41 myń alaıaq sottaldy

ASTANA. KAZINFORM – Qytaı sottary telekommýnıkatsııalyq alaıaqtyqqa qarsy kúres aıasynda sońǵy bes jylda Mıanmadan ekstradıtsııalanǵan ondaǵan myń adamǵa úkim shyǵardy. Bul týraly beısenbi kúni QHR Joǵarǵy Halyq soty habarlady, dep jazdy Kazinform-nyń Beıjińdegi menshikti tilshisi.

Joǵarǵy sot ınstantsııasynyń ókili Van Bın baspasóz máslıhatynda Mıanmanyń soltústiginde jumys isteıtin eń iri Mın jáne Baı týystyq toptarǵa qatysty sot protsesteri tolyǵymen aıaqtalǵanyn málimdedi. Bılik organdary áreketteriniń nátıjesinde eki shekararalyq top joıyldy.

Vedomstvo atap ótkendeı, 2025 jyldyń sońyna deıin sottar Mıanmadaǵy alaıaqtyq ortalyqtar qyzmetine tikeleı qatysy bar 27 myńnan astam isti qaraýyn aıaqtaǵan. Tyńdaý qorytyndylary boıynsha 41 myń adamǵa qatysty úkimder shyǵaryldy.

Van Bınniń aıtýynsha, ádil sot top jetekshileri jáne kisi óltirý men adam urlaýdy qosa alǵanda, zorlyq-zombylyq qylmystaryna qatysqandarǵa erekshe qatal qaraıdy. Mıanmanyń soltústigindegi alaıaqtyq isteri boıynsha 39 aıyptalýshyǵa ómir boıy bas bostandyǵynan aıyrý nemese odan da qatań jaza taǵaıyndaldy, onyń ishinde 16 adam ólim jazasyna kesildi.

2021-2025 jyldary birinshi satydaǵy sottar telekommýnıkatsııa jáne jelilik alaıaqtyqqa qatysty 159 myńnan astam qylmystyq isti qarap, olar boıynsha 338 myńnan astam adam sottaldy.

2023 jyly aıaqtalǵan ister sany jáne sottalǵandar sany sáıkesinshe 48,4% jáne 38,6%-ǵa ósti. 2024 jyly bul kórsetkishter 29,4% jáne 26,7%-ǵa artqan bolatyn. 2025 jyly ósim 1,2% jáne 4,5%-ǵa deıin baıaýlady, bul transshekaralyq qylmystyq áreketke qarsy kúres sharalary tıimdiliginiń artýyn kórsetip otyr.

Osyǵan deıin Qytaıda Mıanmadan ekstradıtsııalanǵan 11 myńnan asa telefon alaıaǵy tergeýge alynǵanyn jazdyq.