Qytaıda munaı men gaz óndirý kólemi tarıhı rekordqa jetti
ASTANA. KAZINFORM – Qytaıda ótken jyldyń qorytyndysy boıynsha munaı men gaz óndirý kólemi munaı ekvıvalentimen eseptegende 420 mln tonnaǵa jetip, tarıhı rekord jańartty. Bul týraly Kazinform agenttiginiń Beıjińdegi menshikti tilshisi Xinhua agenttigine silteme jasap habarlaıdy.
Bul derekter QHR Memlekettik energetıka basqarmasynyń jyldyq esebinde jarııalandy.
Qujatta mundaı nátıje eldiń energetıkalyq táýelsizdigi aıtarlyqtaı nyǵaıǵanyn kórsetetini atap ótilgen.
2025 jyly Qytaıda shıki munaı óndirý kólemi rekordtyq 216 mln tonnaǵa jetti.
Al taqtatas munaıyn óndirý 8,5 mln tonnadan asyp, 2018 jylmen salystyrǵanda on eseden kóp ósti.
Tabıǵı gaz óndirý kólemi bir jylda 10 mlrd tekshe metrge artty. Osylaısha, bul kórsetkish toǵyzynshy jyl qatarynan turaqty ósim kórsetti.
2026 jyly Qytaıdyń munaı-gaz salasy ken oryndaryn barlaý jáne ıgerý jónindegi jańa strategııalyq baǵdarlamalardy júzege asyrýǵa kirisedi.
Beıjiń salaǵa salynatyn ınvestıtsııa kólemin ulǵaıtýdy jalǵastyryp, jyl saıynǵy shıki munaı óndirisin 200 mln tonnadan joǵary deńgeıde saqtaýdy jáne tabıǵı gaz óndirý kólemin odan ári arttyrýdy josparlap otyr.
Osyǵan deıin Qytaıdyń álemdegi eń iri keshendi kólik júıesin qalyptastyrǵany týraly jazdyq.
