Qytaıda Mın áýletine jatatyn tarıhı munaranyń shatyry opyrylyp tústi
ASTANA. KAZINFORM — Qytaıdyń shyǵysyndaǵy tarıhı eskertkishterimen tanymal Anhoı provıntsııasy jýyrda ǵana jóndelgen Fenıan munarasyna baılanysty oqıǵadan keıin taǵy da jurt nazarynda, dep habarlaıdy Kazinform tilshisi.
Jergilikti BAQ málimetinshe, munaranyń shatyrynan qysh plıtalar opyrylyp túsken. Bul jaǵdaı jergilikti turǵyndar men mádenı murany qorǵaý salasynyń mamandary arasynda alańdaýshylyq týdyrdy.
Fenıan baraban munarasy Mın áýleti dáýirindegi tarıhı nysandar kesheniniń bir bóligi sanalady jáne óńirdiń mádenı murasynda mańyzdy ról atqarady. Jaqynda munaranyń sáýlettik kelbetin saqtaý maqsatynda júrgizilgen birneshe mıllıon ıýanǵa baǵalanǵan jóndeý jumystary endi osy oqıǵadan keıin qaıta tekseriledi.
Anhoı provıntsııasynyń bıligi qazirdiń ózinde shatyrdyń qulaý sebepterin anyqtaý jáne keltirilgen zalaldy baǵalaý boıynsha tergeýdi bastady. Aldyn ala málimetter boıynsha, qoldanylǵan qurylys materıaldarynyń sapasyna nemese jóndeý protsesiniń ózine qatysty aqaýlar bolýy múmkin. Abyroı bolǵanda, zardap shekkender joq.
Chýchjoý qalasynyń memlekettik resýrstar saýdasy ortalyǵynyń veb-saıtyndaǵy málimetke sáıkes, jóndeý jumystaryna arnalǵan kelisimshart shamamen 3,4 mıllıon ıýanǵa (shamamen 473 300 AQSh dollary) baǵalanǵan, al sońǵy esep boıynsha tólem 2,9 mıllıon ıýan kóleminde júrgizilgen. Jobanyń qaýipsizdik pen sapa talaptaryna sáıkestigi qanaǵattanarlyq dep baǵalanǵan.
Buǵan deıin habarlanǵandaı, Qytaıdyń ońtústiginde kóshkin júrip, úsh adam kóz jumdy.