Qytaıda «Meniń Altaıym» telehıkaıasy bas telearna reıtıngisinde top bastady

ASTANA. KAZINFORM – Qytaı qazaqtary týraly «Meniń Altaıym» atty 8 bólimnen turatyn týyndy Qytaı Ortalyq Televızııasy CCTV-1 telearnasyndaǵy kórilimi eń joǵary telehıkaıa atandy.

Reople.com saıtynyń habarlaýynsha, telehıkaıa kógildir ekranǵa shyqqan alǵashqy kúni-aq birinshi orynǵa shyqqan.

Sondaı-aq, Qytaıdyń onlaın vıdeo platformasyndaǵy telehıkaıanyń kórilimi alǵashqy eki kúnde 10 mıllıonnan asty. Al qytaılyq 抖音(Tik Tok) jáne 微博(Weibo) áleýmettik jelilerinde «Meniń Altaıym» eń kóp izdelgen sózge aınalǵan. 

Zhihu.com saıtynyń habarlaýynsha, «Meniń Altaıym» týyndysy qytaılyqtardyń Shyńjańǵa kóptep saıahattap kelýine sebep bolǵan. Bul kúnde, telehıkaıa túsirilimi bolǵan ásem tábıǵatqa kelýshiler sany artyp, jergilikti qonaqúılerge tapsyrys artty.

Aıta keteıik, «Meniń Altaıym» telehıkaıasy jazýshy Lı Jıýýannyń shyǵarmalar jelisi boıynsha túsirilgen. Basty rólderde qytaılyq tanymal akter Ma Iılı jáne Chjoý Iran, shyńjańdyq qandasymyz Alma men Qaırat oınaıdy.

Shyǵarma 2010 jyly jaryq kórgen. Onda jazýshy Lı Jıýýannyń anasymen birge Altaı aımaǵynyń qazaq aýylyndaǵy bastan keshken oqıǵalary, kórkem tabıǵat pen qazaqtardyń turmys-tirshiligi sýretteledi.

Aıta keteıik, buǵan deıin Qytaı qazaqtary týraly telehıkaıa osy eldiń basty telearnasynda kórsetiletini týraly habarlaǵan edik.