Qytaıda mektep oqýshylarynyń jartysynan kóbi JI paıdalanyp júr
ASTANA. KAZINFORM — Qytaıda bastaýysh jáne orta mektep oqýshylarynyń jartysynan kóbi jasandy ıntellektti paıdalanady. Bul týraly eldegi balalar men jasóspirimderdi ǵylymı-zertteý ortalyǵy júrgizgen ulttyq saýalnama derekteri kýálandyryp otyr, dep habarlaıdy China Daily.
Saýalnamaǵa sáıkes, mektep oqýshylarynyń 60%-dan astamy neırojelilermen jumys isteý tájirıbesine ıe jáne besten bir bóligi JI quraldaryn únemi paıdalanyp júr. Keń aýqymdy zertteý eldiń jeti aımaǵy, sonyń ishinde Beıjiń, Gýandýn jáne Henan provıntsııalaryndaǵy 8500 oqýshyny qamtydy.
Suralǵandardyń shamamen 71%-y JI-di aqparat izdeý jáne úı tapsyrmasyn oryndaý kezinde paıdalanady. Mektep oqýshylarynyń taǵy 40%-y neırojeliler kómegimen óleńder, sýretter jáne plakattar sııaqty shyǵarmashylyq jobalar jasaıdy.
Jastardyń aıtarlyqtaı bóligi JI-dan emotsıonaldy qoldaý taýyp júr. Mektep oqýshylarynyń 35%-dan astamy chat-bottarmen hat jazysyp, olarmen óz sezimderimen bólisedi. Oqýshylardyń shamamen 32%-y bul tehnologııalardy oıyn-saýyq maqsatynda paıdalanyp júr.
Aıta ketý kerek, 2025 jyly Qytaıdyń Bilim mınıstrligi mektepterde tehnologııalardy paıdalanýdy retteıtin arnaıy nusqaýlar shyǵardy. Erejelerde oqýshylardyń jasyna baılanysty kópdeńgeıli tásil qarastyrylǵan.
Bastaýysh synyp oqýshylaryna úı tapsyrmasyn oryndaýda generatıvti JI paıdalanýǵa tyıym salyndy. Orta synyp oqýshylary neırojeliler arqyly jasalǵan mazmundy zertteı alady. Joǵary synyp oqýshylaryna algorıtmderdiń tehnıkalyq prıntsıpterin úırenýge ruqsat etildi.
Sáýir aıynda tıisti vedomstvo sondaı-aq mektep baǵdarlamalary, kúndelikti oqytý jáne baǵalaý júıelerine JI engizý josparlaryn jarııalady.
Osyǵan deıin Qytaıda oqýshylardyń úı tapsyrmasyn JI tekserip jatqanyn jazdyq.
