Qytaıda Mbappe qatysqan matchtar men jarnamalardy kórsetý toqtatyldy
ASTANA. KAZINFORM — Qytaıdyń memlekettik telearnasy keshe keshten bastap Frantsııa quramasynyń shabýylshysy Kılıan Mbappe qatysqan matchtar men jarystardyń kórsetilimin tolyq toqtatyp, onyń qatysýymen túsirilgen barlyq jarnamany efırden alyp tastady. Bul týraly Kazinform agenttiginiń Beıjińdegi menshikti tilshisi The Paper basylymyna silteme jasap habarlaıdy.
Qytaıdyń ortalyq telearnasy mundaı sheshimdi fýtbolshynyń Qytaıǵa qatysty «jaǵymsyz áreketine» baılanysty qabyldaǵan. Shekteý shabýylshy óner kórsetetin Ispanııanyń La Lıgasy matchtarynyń kórsetilimine de qatysty.
Qytaıdyń memlekettik teleradıokompanııasy CCTV basqaratyn jańalyqtar qosymshalarynan da Frantsııa shabýylshysyna qatysty materıaldar óshirildi.
Osydan keıin Kılıan Mbappe «H» áleýmettik jelisindegi paraqshasynda frantsýz, qytaı jáne aǵylshyn tilderinde resmı túrde keshirim surady.
– Jaqynda bergen suhbatymda ózim beınelengen sýretke qatysty pikir bildirdim. Meniń pikirim oılanbaı aıtyldy. Endi onyń Qytaıdaǵy kóptegen adamnyń jáne álemniń túkpir-túkpirindegi qytaı qaýymdastyqtary ókilderiniń kóńiline tıgenin túsindim. Sózderime renjigen barsha adamnan keshirim suraımyn. Meniń mundaı nıetim bolǵan joq. Qytaı halqyna jáne onyń tarıhyna zor qurmetpen qaraımyn. Aıtqan sózderime ókinemin, – dep jazdy ol.
Eske salaıyq, qoǵamnyń narazylyǵyna Kılıan Mbappeniń Qytaı Halyq Respýblıkasynyń negizin qalaýshy Mao Tszedýnǵa qatysty aıtqan pikirleri túsirilgen beınejazbanyń ınternette taralýy sebep boldy.
Buǵan deıin Qytaı Mbappemen jarnamalyq kelisimsharttardyń buzylýyna qatysty pikir bildirgeni habarlanǵan edi.
