Qytaıda «Matmo» taıfýnyna baılanysty eń joǵary deńgeıdegi eskertý jarııalandy
ASTANA. KAZINFORM — Qytaıdyń meteorologııalyq qyzmetteri men tótenshe jaǵdaılar jónindegi vedomstvolary eldiń ońtústik jaǵalaýyna qaraı jyljyp kele jatqan «Matmo» taıfýnyna baılanysty eskertý jáne áreket etý deńgeıin joǵarylatty, dep habarlaıdy Sınhýa.
«Matmo» — 2025 jylǵy Tynyq muhıtyndaǵy 21-shi taıfýn. Ol kúsheıip, Qytaıdyń ońtústigine, atap aıtqanda Gýandýn jáne Haınan provıntsııalarynyń jaǵalaýyna qaraı baǵyt alyp keledi.
Qytaıdyń Ulttyq meteorologııalyq ortalyǵy senbi keshke buǵan deıin engizilgen «qyzǵylt sary» deńgeıdegi taıfýn týraly eskertýdi eń joǵary «qyzyl» deńgeıge kóterdi. Sınoptıkterdiń boljamynsha, taıfýn jeksenbi kúni túske qaraı atalǵan óńirlerdiń jaǵalaýyna jetip, qurlyqqa shyǵýy múmkin.
Haınan provıntsııasynyń meteostantsııasy habarlaǵandaı, senbi kúni saǵat 18:00-degi jaǵdaı boıynsha «Matmo» taıfýnynyń ortalyǵy Ońtústik Qytaı teńizi ústinde, Venchan qalasynan shamamen 400 shaqyrym ońtústik-shyǵysta ornalasqan. Taıfýn ortalyǵyndaǵy jeldiń jyldamdyǵy 35 m/s-qa jetken.
Boljamǵa sáıkes, taıfýn soltústik-batys baǵytta saǵatyna 25–30 shaqyrym jyldamdyqpen qozǵalyp, birtindep kúsheıe túsedi. Onyń jel ekpini 42–48 m/s bolatyn kúshti taıfýn sanatyna jetýi yqtımal.
QHR Sý tasqyny men qurǵaqshylyqpen kúres jónindegi memlekettik shtaby Gýandýn men Haınan provıntsııalarynda sý tasqyny men taıfýnǵa qarsy áreket etý rejımin 3-deńgeıge kóterdi. Al Gýansı-Chjýan avtonomııalyq aýdanynda 4-deńgeıdegi áreket etý tártibi saqtalyp otyr.
Budan bólek, senbi kúni saǵat 19:00-de Haınan provıntsııasynyń bıligi taıfýnǵa qarsy áreket etý deńgeıin 1-ge deıin kóterdi, bul eldegi eń joǵary deńgeı bolyp sanalady.
Aıta ketelik «Býaloı» taıfýnynyń Vetnamǵa keltirgen shyǵyny 518 mıllıon dollarǵa baǵalandy.