Qytaıda kópfýnktsııaly avtobýstardyń tanymaldyǵy artyp keledi

ASTANA. KAZINFORM – Qytaıdyń ońtústiginde demalys pen gastronomııaǵa arnalǵan kreatıvti keńistikke aınaldyrylǵan taqyryptyq avtobýstar keńinen taralyp otyr, dep habarlaıdy South China Morning Post.

Eń jarqyn mysaldardyń biri — Gýanchjoý qalasyndaǵy eki qabatty «Yuetao Bus». Avtobýs ishi dástúrli kanton sáýleti stılinde bezendirilgen, al mázirinde klassıkalyq dımsamdar, asshaıan qosylǵan tushparalar jáne et delıkatesteri usynylady.

Bir jarym saǵattyq týrdyń quny 99–128 ıýan ($14–19) aralyǵynda. Bul jolaýshylarǵa gastronomııalyq tájirıbeni qaladaǵy negizgi nysandarǵa ekskýrsııamen ushtastyrýǵa múmkindik beredi. Baǵdarlama Kanton munarasy men Gýandýn óner murajaıy sııaqty kórikti jerlerdi qamtıdy.

Gýanchjoýdaǵy «Dangdang» avtobýstary da oıyn-saýyq ındýstrııasyna baǵyttalǵan. 40 ıýan ($5,8) tólegen jolaýshylar 75 mınýttyq baǵdarlamaǵa qatysa alady. Onyń ishinde kıno kórý, kanton operasy ártisteriniń qoıylymdary, sıqyrly shoýlar jáne karaoke bar.

Al kórshiles Shenchjen qalasy kólik qyzmetin jumys isteıtin turǵyndardyń qajettilikterine beıimdeýge basymdyq bergen. Munda turǵyndar aldyn ala tapsyrys berý arqyly jol ústinde nebári 8 ıýanǵa ($1,15) tańǵy asqa tapsyrys bere alady.

Áleýmettik bastama Dýngýan qalasynda da júzege asyrylyp jatyr. Munda mobıldi shashtaraz qyzmeti engizilgen. Kásibı mamandar men qajetti jabdyqtarmen qamtamasyz etilgen jyljymaly salondar qart adamdar men áleýmettik osal toptarǵa tegin qyzmet kórsetedi.

Bul ózgerister Qytaıdyń iri týrıstik aımaqtarynyń biri — Gýandýn provıntsııasy jyl saıyn 950 mıllıonnan astam týrıst qabyldap, 2027 jylǵa qaraı týrızmnen túsetin tabysty 1,3 trıllıon ıýanǵa ($188 mlrd) jetkizýge umtylýy aıasynda júzege asýda.

Buǵan deıin Qytaı týrısteri úshin Astana qalasyna týrlar uıymdastyrylatyny habarlanǵan edi.