Qytaıda kıberkeńistikke qatysty 180-nen astam zań men normatıvtik akt kúshine endi
ASTANA. KAZINFORM — Qytaıda ınternet salasynyń damýyna qoıylatyn talaptarǵa saı keletin quqyqtyq júıe is júzinde tolyq qalyptastyryldy, dep habarlaıdy Sınhýa.
Ótken jyldyń jeltoqsan aıyndaǵy jaǵdaı boıynsha elde kıberkeńistikke qatysty 180-nen astam zań men normatıvtik akt kúshine engen. Bul týraly seısenbi kúni QHR Memlekettik ınternet-aqparat basqarmasy jarııalaǵan esepte aıtyldy.
Qujatta Qytaıdyń 14-besjyldyq kezeńinde kıberkeńistikte zań ústemdigin qamtamasyz etý salasyndaǵy jetistikterine sholý jasalǵan.
Esepke sáıkes, 2025 jyly elde kıberqaýipsizdik pen tsıfrlandyrýdyń bazalyq júıeleri odan ári jetildirilip, ınternet salasyndaǵy quqyq qoldaný tetikteri men ınstıtýttary nyǵaıa túsken. Bul aqparattyq tehnologııalardy sot júıesinde keńinen paıdalanýǵa yqpal etken.
Sonymen qatar, ótken jyly Qytaı kıberkeńistikti zań negizinde basqarý boıynsha aqparattyq-túsindirý jumystaryn kúsheıtip, ınternet keńistigin retteýge arnalǵan halyqaralyq erejelerdi ázirleý isinde de belsendirek ról atqarǵan.
2025 jyly kıberkeńistiktegi zań buzýshylyqtardyń aldyn alý jáne zań talaptarynyń oryndalýyn qamtamasyz etý jumystary da jalǵastyryldy. Esepke sáıkes, ınternetti basqarý organdary 5 811 veb-saıt pen onlaın-platforma ókilderin jaýapqa shaqyrǵan. Nátıjesinde 1 646 eskertý berilip, 521 saıt pen platformaǵa aıyppul salynǵan, sondaı-aq 9 637 veb-saıt pen qosymsha tirkeýden shyǵarylyp, jabylǵan.
Budan buryn Qytaı astanasynda mamyrdan bastap drondarǵa tolyq tyıym salynatyny aıtyldy.
