Qytaıda keme jasaıtyn korporatsııanyń basshysy para alǵany úshin 13 jylǵa sottaldy

Qytaıda China Shipbuilding Corporation kompanııasynyń burynǵy tóraǵasy para alǵany jáne bıligin asyra paıdalanǵany úshin 13 jylǵa sottaldy, dep habarlaıdy Kazinform agenttigi Sınhýa basylymyna silteme jasap. 

Qytaı soty seısenbi kúni Qytaı keme jasaý korporatsııasynyń (CSIC) burynǵy tóraǵasy Hý Venmındi para alǵany jáne bıligin asyra paıdalanǵany úshin 13 jylǵa bas bostandyǵynan aıyrdy. 

Shanhaıdyń birinshi aralyq halyq sotynyń sheshimimen Hý Venmınge 5 mln ıýan aıyppul salynyp, para retinde alǵan búkil aqshasy tárkilenip, memleket qazynasyna aýdaryldy.

Sot Hý Venmındi 2001-2020 jyldar aralyǵynda memlekettik kásiporyndarda ártúrli laýazym atqaryp júrgende qyzmet babyn asyra paıdalanyp, tıisti uıymdar men jeke tulǵalarǵa qurylys kelisimshartyn alýǵa, iskerlik yntymaqtastyq qurýǵa, aktıvterdi ıelenýge, mansapta kóterilýge jáne depozıt tartýǵa kómekteskeni úshin kináli dep tapty.

Onyń aqysyna Hý Venmın olardan jalpy somasy 59,86 mln ıýannan (shamamen 8,43 mln AQSh dollary) astam aqsha men qundy zattar alǵan. 

Sot úkiminde onyń 2013-2015 jyldar aralyǵynda CSIC enshiles uıymyn qaıta qurylymdaý kezinde CSIC tóraǵasy retinde ókilettigin asyra paıdalanyp, ulttyq múddege orasan zor zııan keltirgeni atap ótilgen.