Qytaıda kedeılikti azaıtý jónindegi jahandyq alıans quryldy
ASTANA. KAZINFORM — 27 mamyr kúni Beıjińde ótken halyqaralyq forýmda kedeılikti azaıtý jáne damytý jónindegi jahandyq seriktestik alıansynyń qurylǵany jarııalandy. Birlestikti qurýǵa 54 memleket pen toǵyz halyqaralyq uıym bastamashy boldy, dep habarlaıdy agenttiktiń Beıjińdegi menshikti tilshisi.
2026 jylǵy Kedeılikti azaıtý jáne damytý jónindegi joǵary deńgeıli forýmnyń ashylýynda sóz sóılegen Qytaı Memlekettik keńesi tóraǵasynyń orynbasary Lıý Gochjýn eldiń absolıýtti kedeılikpen kúreste tabysty jeńiske jetkenin atap ótti.
Alıans jumysyn damytý úshin Beıjiń 2030 jylǵa deıingi BUU maqsattaryn iske asyrýdy jedeldetý, tájirıbe almasýdy kúsheıtý, naryqtyq tetikterdi damytý jáne kópjaqty úılestirýdi arttyrýdy qamtıtyn 4 negizgi bastama usyndy. Qytaı damýshy elderge saıası dıalog, kadrlardy oqytý jáne tehnologııalar transferi arqyly qoldaý kórsetýdi josparlap otyr.
BUU-nyń Qytaıdaǵy úılestirýshisi Stefen Djekson Qytaıdyń 800 mıllıon adamdy kedeılikten shyǵarýdaǵy jetistigin «tańǵalarlyq jetistik» dep atady. Onyń aıtýynsha, bul tájirıbe uıymnyń jahandyq deńgeıde kedeılikti tolyq joıýǵa baǵyttalǵan Turaqty damý maqsattarynyń alǵashqy baǵytyn júzege asyrý úshin asa mańyzdy.
Spıkerdiń sózinshe, búkil álem, ásirese ǵalamdyq ońtústik elderi bul tájirıbeni zerttep, tájirıbede qoldanýǵa muqtaj. Ol sondaı-aq búginde álem boıynsha asa kedeı jaǵdaıda ómir súrip jatqan adamdar sany da dál sol 800 mıllıon adam ekenin aıtty.
Ashylý rásimine Kambodja premer-mınıstriniń orynbasary Vongseı Vıssıt men Shyǵys Tımor premer-mınıstriniń orynbasary Marıaný Sabıný qatysyp, sóz sóıledi. Al Antonıý Gýterrısh forýmǵa quttyqtaý hatyn joldady.
Aıta keteıik, Eýropa 2050 jylǵa qaraı kedeılikti joıýdy maqsat etip otyr.
