Qytaıda Qazaqstannyń týrızm jyly resmı túrde bastaldy
BEIJІŃ. KAZINFORM – Búgin Beıjiń qalasynda Qytaıdaǵy Qazaqstan týrızm jylynyń resmı ashylý saltanaty ótip jatyr. Shara aıasynda Beıjińde Qazaqstan men Qytaı ókilderiniń qatysýymen birqatar qujattarǵa qol qoıyldy.
Atalǵan sharanyń ashylý rásimi Qazaqstan-Qytaı týrıstik jáne ınvestıtsııalyq forýmynan bastalyp, QR Týrızm jáne sport mınıstri Ermek Marjyqpaev quttyqtaý sóz sóıledi.
«Qytaı Halyq Respýblıkasyndaǵy Qazaqstannyń týrızm jyly – eki el arasyndaǵy dostyq qarym-qatynasty nyǵaıtýǵa yqpal etetin erekshe is-shara. Búgingi is-sharamyz osy maqsatqa jetý jolyndaǵy mańyzdy qadam bolyp otyr. Bizdiń dıalogymyz jemisti jáne uzaq merzimdi yntymaqtastyqtyń negizin quraı otyryp, týrızm salasyndaǵy seriktestiktiń jańa kókjıekterin ashady dep senemiz», - dedi mınıstr.
Sondaı-aq ol Qazaqstan – kez kelgen saıahatshyny óziniń kóshpeli mádenıetimen, ǵasyrlarǵa jalǵasqan tarıhymen jáne biregeı tabıǵatymen qyzyqtyratynyn atap ótti.
«Elimizdiń týrıstik áleýeti zor. Bizdiń maqsatymyz – sol baılyqty barlyǵyna qoljetimdi etý», - dep tolyqtyrdy Ermek Marjyqpaev.
Forýmǵa Qytaı Halyq Respýblıkasynyń Mádenıet jáne týrızm mınıstri Sýn Lı de qatysty.
«Kazakh Tourism» UK» AQ basqarma tóraǵasy Qaırat Sádýaqasov ta sóz sóıledi. Ol jınalǵan qaýymdy «Kazakh Tourism» ulttyq kompanııasymen tanystyrdy.
«Qazaqstan – qytaılyq týrıster úshin eń tartymdy baǵyttardyń biri ekenine senimdimiz. Ol vızasyz rejımdi qoldaıtyn kórshiles el ǵana emes, sonymen qatar «Bir beldeý, bir jol» bastamasynyń strategııalyq seriktesi. Biz týrısterdiń nazaryna eko-etnotýrızm, oıyn-saýyq jáne resmı is-sharalardy qamtıtyn «Eco-Ethnic-Entertainment-Events» kontseptsııasyn usynamyz», - dedi Qaırat Sádýaqasov.
Qazaqstandaǵy ár baǵyttyń áleýeti týraly aıta kele, Q.Sádýaqasov forýmǵa qatysýshylardy bıyl Qytaıdaǵy Qazaqstan týrızmi jyly aıasynda ótetin is-sharalarǵa qatysýǵa shaqyrdy. 2024 jylǵa olardyń 35-ten astamy josparlanǵan.
Týrızm jáne ınvestıtsııalyq forým eki paneldik sessııadan turdy:
• «Qytaı saıahatshylary úshin Qazaqstandaǵy uıymdastyrylǵan týrızm múmkindikteri»
• «Týrıstik bıznestegi áriptestik: Qazaqstan-Qytaı arasyndaǵy ınvestıtsııalyq múmkindikter».
Jıynda qytaılyq saıahatshylar úshin uıymdastyrylǵan týrızm múmkindikteri men Qazaqstan-Qytaıdyń ınvestıtsııalyq múmkindikteri talqylandy.
Sondaı-aq forýmǵa qatysýshylar úshin biregeı kórme uıymdastyryldy, onda qonaqtar Qazaqstannyń barlyq 17 aımaǵynyń kórikti jerlerimen tanysa alady.
Forým sońynda qazaqstandyq jáne qytaılyq taraptar arasynda birqatar memorandýmdarǵa qol qoıyldy.
Esterińizge sala keteıik, erteń, 29 naýryzda qonaqtardy Qytaıdaǵy Qazaqstan týrızmi jylynyń resmı ashylý saltanaty, mádenı baǵdarlamasy bar etnoaýyl, sondaı-aq kórnekti ártisterdiń qatysýymen ótetin úlken gala-kontsert kútýde.
