Qytaıda Qazaqstannyń 23 sý salasynyń mamany oqyp jatyr

ASTANA. KAZINFORM — Qytaıda qazaqstandyq sý salasynyń mamandaryn daıarlaýdyń jańa baǵdarlamasy bastaldy.

Qytaıda Qazaqstannyń 23 sý salasynyń mamany oqyp jatyr
Foto: Gov.kz

Qytaıda Qazaqstannyń Sý resýrstary jáne ırrıgatsııa mınıstrligi men China Energy International Group kompanııasynyń yntymaqtastyǵy aıasynda «Aqyldy sý sharýashylyǵy» atty jańa baǵdarlama boıynsha qazaqstandyq 14 mamannan turatyn alǵashqy toptyń oqýy bastaldy.

Mamandar Qytaıdyń gıdrotehnıkalyq qurylystardy salý jáne paıdalaný, sondaı-aq sý resýrstaryn basqarýda tsıfrlyq tehnologııalardy qoldaný tájirıbesin zerdelep jatyr. Sonymen qatar iri gıdrotehnıkalyq qurylystardy paıdalaný men basqarý júıesimen tanysý úshin «Úsh shatqal» jáne «Gechjoýba» gıdrotoraptaryna barý josparlanǵan.

Qytaıda Qazaqstannyń 23 sý salasynyń mamany oqyp jatyr
Foto: Gov.kz

Budan bólek, Qytaıda «Qazsýshar» RMK men Power China International Group Limited kompanııasy arasyndaǵy ózara túsinistik jáne yntymaqtastyq týraly memorandým aıasynda sý salasynyń qazaqstandyq toǵyz mamanynan turatyn úshinshi toptyń oqýy ótip jatyr. Oqý shyǵyndaryn Qytaı tarapy qarjylandyrady.

Semınar sýdy tazartýdyń zamanaýı tehnologııalaryn jáne sý resýrstaryn tıimdi paıdalaný tásilderin zerdeleýge baǵyttalǵan. Oqý Sýchjoý ǵylym jáne tehnologııalar ýnıversıtetinde ótedi. Sonymen qatar Qytaı kásiporyndarynyń praktıkalyq tájirıbesin zertteý úshin Hanchjoý men Shanhaı qalalaryna saparlar uıymdastyrý kózdelgen.

— Mamandardy daıarlaý kezinde sý sharýashylyǵy salasynyń aldynda turǵan búgingi mindetterdi eskerý mańyzdy. Qytaıdaǵy oqý baǵdarlamalary sýdy tazartýdyń zamanaýı tehnologııalaryn, tsıfrlyq sheshimderdi jáne iri gıdrotehnıkalyq qurylystardy paıdalaný tájirıbesin zerdeleýge múmkindik beredi. Bizdiń mindetimiz — alǵan bilimdi Qazaqstandaǵy sý resýrstaryn basqarý tıimdiligin arttyrý úshin paıdalaný, — dedi Sý resýrstary jáne ırrıgatsııa vıtse-mınıstri Talǵat Momyshev.

Qytaıda Qazaqstannyń 23 sý salasynyń mamany oqyp jatyr
Foto: Gov.kz

Buǵan deıin, mamyr aıynda Qazaqstannyń sý salasynyń 34 mamany sý resýrstaryn keshendi basqarý boıynsha oqýdan ótken bolatyn. Jalpy, sońǵy eki jylda Qytaıda 206 qazaqstandyq sý mamany bilimin jetildirdi. Onyń ishinde 2025 jyly 125 maman, al 2026 jyly Power China baǵdarlamasy boıynsha 67 maman jáne China Energy International Group baǵdarlamasy boıynsha 14 maman oqýdan ótti.

QR Sý resýrstary jáne ırrıgatsııa mınıstrligi men Qytaıdyń Power China jáne China Energy International Group kompanııalary 2027 jyly da mamandardy birlesip qaıta daıarlaý jumystaryn jalǵastyrýdy josparlap otyr.

Osyǵan deıin Qazaqstan men Germanııa sý salasynda iri jobalardy birlesip júzege asyratynyn jazǵanbyz.