Qytaıda qaıtarylatyn zymyrandar shyǵaratyn alǵashqy óndiristik bazanyń qurylysy bastaldy
ASTANA. KAZINFORM — Qytaıdyń qaıtarylatyn jáne qaıta paıdalanylatyn zymyrandar shyǵaratyn alǵashqy óndiristik bazasynyń qurylysy 7 qańtar kúni Hanchjoý qalasynda bastaldy. Joba iske qosylǵannan keıin jylyna 25 zymyran óndiredi dep habarlaıdy China Daily.
Belgili bolǵandaı, qytaılyq Space Epoch kompanııasy sol kúni Hanchjoý qalasynyń Tsıantan aýdanynda suıyq otyndy iri jáne orta tasyǵysh-zymyrandardy tolyq qurastyrý, keshendi synaqtan ótkizý jáne teńiz arqyly qaıtarý bazasynyń qurylysyn bastaǵan.
Bul nysan Qytaıdaǵy zymyrandardy teńiz arqyly qaıtarýǵa jáne qaıta paıdalanýǵa arnalǵan tuńǵysh óndiristik baza, sondaı-aq tot baspaıtyn bolattan jasalǵan zymyrandar shyǵaratyn alǵashqy sýperzaýyt.
Jobaǵa jalpy 52 mlrd ıýan ınvestıtsııa salynbaq. Josparǵa sáıkes, baza aýmaǵynda zymyrandardy qaıta paıdalaný ortalyǵy, synaý-tekserý ortalyǵy, sondaı-aq óndiristik keshen salynady. Nysan iske qosylǵannan keıin kásiporyn jylyna 25 zymyran óndirýmen qatar, qaıtarylǵan zymyrandardy jedel tekserý, jóndeý jáne qaıta paıdalaný múmkindigine ıe bolady.
Jospar boıynsha, 2026 jyldyń tamyz aıynda Space Epoch kompanııasy derbes ázirlegen, suıyq ottegi men metan qoldanylatyn, tot baspaıtyn bolattan jasalǵan jáne teńiz arqyly qaıtarylatyn alǵashqy qytaılyq zymyran — «ıÝansınchje-1» osy bazada qurastyrylyp, synaqtan ótkiziledi. Al jyl sońyna qaraı Tsıantan zymyrany birinshi ret ushý jáne qaıta oralý mıssııasyn oryndaýy tıis.
Agenttiktiń málimetinshe, Space Epoch 2019 jyly qurylǵan jáne qaıta paıdalanylatyn suıyq otyndy tasyǵysh-zymyrandardy ázirleýge mamandanǵan jeke menshik kompanııa.
Buǵan deıin Qytaıdyń ońtústigindegi Venchan ǵarysh aılaǵynan eki jańa jer seriginiń sátti ushyrylǵany týraly habarlaǵan bolatynbyz.