Qytaıda qaıta paıdalanylatyn zymyran ınjenerlerine suranys 75% ósti
ASTANA. KAZINFORM — Qytaıda suıyq otyndy qaıta paıdalanylatyn zymyrandardy ázirleıtin ınjenerlerge suranys bıylǵy jyldyń alǵashqy jeti aıynda 75,6 paıyzǵa artty, dep habarlaıdy Beıjińdegi Kazinform agenttiginiń menshikti tilshisi CCTV-ge silteme jasap.
Al kommertsııalyq ǵarysh salasyndaǵy bos jumys oryndarynyń jalpy sany 21,2 paıyzǵa ósti.
Beıjińdegi aeroǵarysh kompanııalary biriniń ókili málim etkendeı, bıylǵy jyldyń alǵashqy alty aıynda kompanııa qyzmetkerleriniń qatary 100-den astam mamanmen tolyqqan. Bul ótken jyldyń sáıkes kezeńindegi kórsetkishten eki ese kóp. Salanyń taǵy bir kásiporny shamamen 200 jańa jumys ornyn ashqan.
Qaıta paıdalanylatyn suıyq otyndy qozǵaltqyshtardy ázirleý salasynda mamandar tapshylyǵy aıqyn baıqalady. Mundaı qozǵaltqyshtar ǵaryshqa ushyrý qunyn tómendetýdiń negizgi faktorlarynyń biri sanalady.
Bul saladaǵy jetekshi ınjenerlerdiń jyldyq jalaqysy 1 mln ıýanǵa (shamamen 140 myń dollar) jetedi. Magıstr dárejesi bar mamandardyń ortasha jyldyq tabysy 320 myń ıýan, al doktorlyq dárejesi bar mamandardyń tabysy 420 myń ıýan shamasynda.
— Kadrlar osy strategııalyq salanyń damýynyń negizgi faktory bolyp qala beredi. Sondyqtan mamandar úshin ǵylymı-zertteý jumystarynan bastap zymyrandardy paıdalanýǵa berýge deıingi barlyq kezeńde básekelestik óte joǵary, — dedi Beıhan ýnıversıteti ınstıtýtynyń dırektory Shen Inchýn.
Kadr tartý jumysyna aımaqtyq bılik organdary da qosyldy. Tszıansý provıntsııasyndaǵy Ýsı qalasynda aeroǵarysh salasynda jumys isteıtin 325 kásiporyn bar. Munda mamandarǵa bastapqy granttar, sýbsıdııalar jáne qyzmettik baspana usynylady. Osyndaı baǵdarlamalar Beıjiń, Shanhaı qalalarynda, sondaı-aq Gýandýn, Haınan jáne Sychýan provıntsııalarynda iske qosylǵan.
Qazir Qytaıda 600-den astam kommertsııalyq aeroǵarysh kompanııasy bar. Beıjiń men Shanhaıdan bólek, Chendý, Sıan, Shenchjen, Chansha, Hefeı jáne basqa da qalalardaǵy kásiporyndar ózderiniń bilikti mamandar komandalaryn qalyptastyryp jatyr.
Buǵan deıin Qytaı strategııalyq zymyrandy sýasty qaıyǵynan synaqtan ótkizgeni habarlanǵan bolatyn.
