Qytaıda kásibin damytqan qazaq qyzy Qazaqstanda bıznes ashpaq
ASTANA. KAZINFORM — Qytaıdaǵy qazaqtar ulttyq kıimnen ajyramaǵan. Bul týraly aspanasty elinde óz brendin qalyptastyrǵan qazaq qyzy Jibek Joly telearnasynyń «Búgin Live» baǵdarlamasynda aıtty.
Kásipker Bulbul Tileýqabylqyzy búginde birneshe baǵytty qatar damytyp otyr. Onyń bıznesi kosmetıka óndirisi men sán ındýstrııasyn qamtıdy.
— Kosmetıka shyǵarýmen aınalysyp júrmin. Qosymsha ulttyq kıimderge tapsyrys qabyldaımyn. Tiginshilerimmen birge eshkimde joq stılderdi qamtımyz. Kóbine bir danadan ǵana tigemiz. Qytaıdaǵy qazaqtar jappaı satyp alady. Mereke-jıyn, toılarda ústinen tastamaıdy, — dedi ol.
Kásipkerdiń sózinshe, árbir buıymda ulttyq mán men mazmun saqtalýy tıis. Sondyqtan oıý-órnekterge erekshe nazar aýdarylady.
— Oıý-órnek, qoshqar múıiz, arqaly órnekke mán beremiz. Kóbine jaǵaly kıimderge, bas kıimderge qoldanamyz. Brendtiń ataýy — «Aıaýlym». Ony tuńǵysh qyzymnyń esimimen baılanystyrdym, — dedi spıker.
Onyń aıtýynsha, bıznestiń damýy básekelestikpen tikeleı baılanysty. Qazir Qytaı naryǵynda ulttyq kıimderge suranys joǵary, bul kásipti keńeıtýge múmkindik berip otyr.
— Qazir Qazaqstan men Qytaı arasyndaǵy baılanys nyǵaıyp keledi. Sondyqtan aldaǵy ýaqytta Qazaqstanda da kásibimdi damytýdy josparlap otyrmyn, — dedi kásipker.
Bulbul Tileýqabylqyzy aldaǵy josparynyń aýqymdy ekenin jasyrmady. Onyń maqsaty — «Aıaýlym» brendin halyqaralyq deńgeıge shyǵarý jáne Qazaqstanda óndiristi damytýǵa ınvestıtsııa salý.
Buǵan deıin qytaılyq tanymal bloger Mańǵystaýǵa qaıta kelgenin jazǵan edik.
