Qytaıda qarttarǵa arnalǵan «aqyly serik bala» qyzmeti tanymal bola bastady
ASTANA. KAZINFORM — Qytaıdyń Chjetszıan provıntsııasynda halyqtyń qartaıýyna baılanysty qarttarǵa otbasylyq qoldaý kórsetýdiń jańa túri — «aqyly serik bala» qyzmeti keńinen tarala bastady. Bul týraly Kazinform agenttiginiń Beıjińdegi menshikti tilshisi jergilikti BAQ-qa silteme jasap habarlaıdy.
QHR Ulttyq statıstıka bıýrosynyń málimetinshe, 2025 jyldyń sońyna qaraı Qytaıda 60 jastan asqan turǵyndar sany 323 mıllıonǵa jetken. Olardyń 130 mıllıonnan astamy otbasynan bólek turady. Qytaıdyń Gerontologııa ǵylymı-zertteý ortalyǵynyń zertteýine sáıkes, eldegi qarttardyń shamamen 25 paıyzy qoǵamnan shet qalyp, jalǵyzdyqty jıi sezinedi.
Suranystyń artýyna baılanysty Hanchjoý, Nınbo jáne Lıshýı qalalarynyń bıligi qarttarǵa kómek kórsetýdiń úsh úlgisin engizdi. Olar: aqysyz volonterlik baǵdarlamalar, shaǵyn syıaqyǵa negizdelgen kórshilerdiń ózara kómegi jáne kommertsııalyq qyzmetter.
Eriktiler qyzmeti jergilikti bılik pen qoǵamdyq uıymdardyń qarjylaı qoldaýymen júzege asyrylady. Alaıda sala ókilderiniń pikirinshe, uıymdastyrýshylarǵa túsetin salmaqtyń aýyrlyǵy bul bastamany keńinen taratýǵa múmkindik bermeıdi.
Kórshilerdiń bir-birine qoldaý kórsetýine negizdelgen bul úlgi boıynsha shaǵyn kólemde sýbsıdııa tólenedi. Nınbo qalasynyń Fenhýa aýdanynda qarttarǵa kúndelikti kómek kórsetken kórshilerge kúnine 80-100 ıýan (11-14 AQSh dollary) kóleminde aqy beriledi.
Kommertsııalyq qyzmetter negizinen ınternettegi jeke habarlandyrýlar arqyly usynylady. Bul salada kóbine jastar jumys isteıdi. Qarttarǵa serik bolyp, kútim kórsetetin mamannyń eki saǵattyq qyzmeti shamamen 150 ıýandy (21 AQSh dollary) quraıdy. Qyzmet túrlerine qan qysymyn ólsheý, azyq-túlik satyp alý, medıtsınalyq mekemelerge erip barý jáne kúndelikti áńgimelesip, kóńil bólý kiredi.
Sala mamandary «aqyly serik bala» ataýynyń quqyqtyq jáne etıkalyq turǵydan birqatar másele týyndatatynyn aıtady. Olardyń pikirinshe, otbasy músheleriniń qamqorlyǵy ómir boıǵy jaýapkershilikke negizdelse, aqyly qyzmet kelisimshart merzimimen shekteledi. Al qyzmettiń kenetten toqtatylýy qarttardyń kóńiline qaıaý salyp, psıhologııalyq kúıine keri áser etýi múmkin.
Suranys artqanyna qaramastan, klıentterdiń senimsizdigi men alaıaqtyqqa qatysty qaýipter kommertsııalyq qyzmetterdiń keń taralýyna kedergi keltirip otyr. Sala ókilderiniń aıtýynsha, jaldamaly kútýshilerdiń kóbi qarttardy alańdatpaý úshin ózderin otbasynyń tanystary retinde tanystyryp, qyzmetiniń aqyly ekenin ashyp aıtpaıdy.
Buǵan deıin Qytaı halqynyń tórtten birine jýyǵyn 60 jastan asqan turǵyndar quraıtyny habarlanǵan bolatyn.
