Qytaıda qarttardyń sany alǵash ret balalar sanynan asty
ASTANA. KAZINFORM — Qytaıda tarıhta alǵash ret qarttarǵa túsetin demografııalyq júkteme balalarǵa túsetin júktemeden asyp tústi. Bul týraly Kazinform agenttiginiń menshikti tilshisi jergilikti buqaralyq aqparat quraldaryna silteme jasap habarlady.
Qytaı Halyq Respýblıkasynyń Memlekettik statıstıka bıýrosynyń málimetinshe, 2025 jyly eldegi 65 jastan asqan turǵyndardyń sany 223,65 mıllıon adamǵa jetken. Al 0 men 14 jas aralyǵyndaǵy balalar sany 212,76 mıllıon boldy.
Demografııalyq júktemeniń jalpy koeffıtsıenti 45,1 paıyz boldy. Bul rette qarttarǵa túsetin júkteme kórsetkishi 23,1 paıyzǵa deıin ósip, balalarǵa túsetin júktemeden (22 paıyz) asyp tústi.
Eldiń birqatar óńirinde týý kórsetkishiniń tómendeýi jáne balabaqshalarǵa baratyn balalar sanynyń azaıýy saldarynan bos qalǵan mektepke deıingi mekemeler qarttar úıleri men gerontologııalyq ortalyqtarǵa aınaldyrylyp jatyr. Buǵan deıin tárbıeshiler daıarlaǵan kolledjderde qazir qarttarǵa kútim jasaý qyzmetterin aqyldy tehnologııalar arqyly basqarý jáne áleýmettik qyzmet kórsetý mamandyqtary ashylýda.
Egde jastaǵy halyq sanynyń artýy «kúmis ekonomıkanyń» damýyna yqpal etti. Qytaıda qart adamdar arasynda kallıgrafııa men án aıtýdy, jasandy ıntellektini paıdalanýdy, beınemontaj jasaýdy jáne ushqyshsyz ushý apparattaryn basqarýdy úıretetin mamandarǵa suranys artyp keledi.
Buǵan deıin Qytaıda halyqtyń qartaıýy jedeldep, otbasylyq kútimniń jetispeýshiligin óteýge baǵyttalǵan «jalǵa alynatyn balalar» qyzmetiniń tanymal bola bastaǵany habarlanǵan edi.
Aıta ketelik Qytaıda bolashaq qalasynyń tujyrymdamasy tanystyrylǵan edi.
