Qytaıda qandasymyz jeńil atletıkadan bir aptada eki ret bas júlde jeńip aldy
ASTANA. KAZINFORM – Qytaıda turatyn qandasymyz Dına Nurlanqyzy jeńil atletıkadan jabyq keshendegi Qytaı chempıonatynda bıiktikke sekirý jarysynan bas júldeni qanjyǵalady. Bul týraly qytaılyq kazakcnr.com (CNR) habarlady.
Jeńil atletıkadan jabyq keshendegi áıelder arasyndaǵy bıiktikke sekirý jarysynda Dına Nurlanqyzy 1.87 metrlik nátıjemen bas júldeni qanjyǵalady. Ol Osydan bir apta buryn jeńil atletıkadan jabyq keshende ótken Ulttyq Gran-prı jarysynda da 1.87 metrlik kórsetkishpen chempıon atanǵan bolatyn.
Dına Nurlanqyzy 1,90 metrdi baǵyndyra alatynyna senimdi. Ol jattyǵýda 1,90 metrden asyp ketkenin jáne kelesi jarystarda óziniń osy mejeni baǵyndyrýǵa tyrysatynyn aıtqan.
Aıta keteıik, Dına Nurlanqyzy 1998 jyly Qytaıdyń Qulja aýdanynyń Oımanbulaq aýylynda dúnıege kelgen. 15 jasynda Shyńjań quramasyna qabyldanǵan. Ol 2021 jylǵy jeńil atletıkadan ulttyq chempıonatta bıiktikke sekirýden 1,84 metr kórsetkishimen ekinshi oryndy jeńip alsa, 2023 jylǵy jeńil atletıkadan el chempıonatynda bas júldeni enshilegen. Dına Nurlanqyzynyń boıynyń bıiktigi 1,87 metr. Ol Shyńjańdaǵy bıiktikke sekirý sportshylary arasyndaǵy erekshe talant ıesi.
Eske sala keteıik, buǵan deıin tıbette kóshpeliler mádenıetin áıgileıtin erekshe shaıhana ashylǵany týraly jazǵan bolatynbyz.