Qytaıda qandala shyqqan qonaqúılerdi kórsetetin karta paıda boldy
ASTANA. KAZINFORM — Qytaıda qonaqúılerden qandala tabylǵany týraly aqparatty kórsetetin ınteraktıvti karta iske qosyldy. Alaıda kartadaǵy málimetterdiń durystyǵyna kúmán keltirgen qonaqúı ıeleri narazylyq bildirdi. Bul týraly Kazinform agenttiginiń Beıjińdegi menshikti tilshisi SCMP basylymyna silteme jasap habarlady.
21 qyrkúıekten bastap Qytaıdyń WeChat messendjerindegi «Qandala kartasy» shaǵyn qosymshasyn 200 myń adam paıdalanǵan. Olar el aýmaǵyndaǵy 600-den astam qonaqúıdi kartaǵa belgilegen. Alaıda bıznes ókilderi kórsetilgen belgilerdiń kóbi jalǵan ekenin málimdedi.
Van esimdi qosymshany ázirleýshi bul jobany jazda ózi qandala shaǵyp, zardap shekkennen keıin qolǵa alǵan.
— Qonaqúılerdegi qandala týraly aqparat ár jerde shashyrańqy, al jobanyń ózi ázirshe minsiz emes, — dedi ol.
Qazan aıynda fotodálelderdi mindetti túrde usyný talaby bolmaǵandyqtan, servıs eki ret buǵattaldy. Osydan keıin Van qosymshaǵa zııankester týraly aqparattyq nusqaýlyq engizip, eki kómekshiniń qatysýymen fotosýretterdi tekserý júıesin iske qosty.
Qazirdiń ózinde tórt qonaqúı shaǵym túsirip, dezınsektsııa júrgizilgenin rastaıtyn aktilerdi usynǵan. Atap aıtqanda, Beıjińdegi Guangzhou Mansion qonaqúıi 24 bólmeni táýelsiz tekserýden ótkizgennen keıin, kartadaǵy belgini aldyrtyp tastady. Tekserý barysynda jándikter anyqtalmaǵan.
Jindu zań fırmasynyń ókili Lın Feıjan mundaı belgilerdiń bıznes bedeline nuqsan keltirý qaýpi bar ekenin aıtty. Ol derekterdiń shynaıylyǵyna qatysty paıdalanýshy kelisimin engizip, aqparatty tekserý jumysyna entomolog mamandardy tartýdy usyndy.
Eske salaıyq, buǵan deıin Qytaı ǵalymdary qandy qaterli isik jasýshalarynan tazartatyn qurylǵy jasaǵanyn habarlaǵan edik.
