Qytaıda halyqtyń 90%-y úıinen emhanaǵa deıin 15 mınýtta jete alady
ASTANA. KAZINFORM — Sońǵy bes jyl Qytaıdyń densaýlyq saqtaý júıesi úshin tarıhı progress kezeńi boldy. Bul ýaqytta medıtsına salasynyń kóptegen baǵytynda aıtarlyqtaı jaqsarý baıqalǵan, dep habarlaıdy Sınhýa.
Bul týraly Qytaı Halyq Respýblıkasynyń Memlekettik densaýlyq saqtaý komıteti tóraǵasy Leı Haıchao 14-shaqyrylymdaǵy Búkilqytaılyq halyq ókilderi jınalysy tórtinshi sessııasy aıasyndaǵy baspasóz máslıhatynda málimdedi.
Leı Haıchao atap ótkendeı, alǵashqy medıtsınalyq kómekti damytýǵa baǵyttalǵan saıasat nátıjesinde bastapqy deńgeıdegi medıtsınalyq mekemelerge júginetinder sany turaqty túrde artqan. 2025 jyly el boıynsha barlyq medıtsınalyq dıagnostıka men emdeýdiń 52,6%-y osyndaı alǵashqy medıtsınalyq uıymdarda júrgizilgen. Sonymen qatar, qalada da, aýyldyq jerlerde de bastapqy deńgeıde jumys isteıtin medıtsına qyzmetkerleriniń sany kóbeıip keledi.
— Qazirgi ýaqytta Qytaı halqynyń 90%-dan astamy úıinen eń jaqyn medıtsınalyq mekemege 15 mınýt ishinde jete alady. 2025 jyldyń sońyna qaraı elde 1,1 mıllıonnan astam medıtsınalyq mekeme jáne 16 mıllıonnan astam medıtsına qyzmetkeri jumys isteıdi. Bul sharalar 1,4 mıllıard halqy bar elde medıtsınalyq qyzmettiń qoljetimdiligi men ádildigin arttyrýǵa múmkindik bergen, — dedi Memlekettik densaýlyq saqtaý komıteti tóraǵasy.
Aldaǵy ýaqytta negizgi kúsh alǵashqy medıtsınalyq kómekti kúsheıtýge jáne qyzmet kórsetý múmkindikterin arttyrýǵa baǵyttalady. Bul jumystar pedıatrııa, psıhıkalyq densaýlyqty qorǵaý, jalpy medıtsına jáne ońaltý isi boıynsha meıirgerlik sııaqty baǵyttardy qamtıdy.
Sonymen qatar halyqtyń medıtsınalyq qyzmetke qoljetimdiligin keńeıtý úshin mobıldi medıtsınalyq brıgadalar, telemedıtsına jáne onlaın-konsýltatsııalar burynǵysynsha qoldanylatyn bolady.
Leı Haıchao densaýlyq saqtaý júıesin reformalaý ári qoǵamdyq densaýlyq qaýipsizdigin nyǵaıtý jumystary jalǵasatynyn aıtty.
Eske salsaq, Qytaı 2026–2030 jyldarǵa arnalǵan 15-besjyldyq jospar aıasynda halyqtyń ortasha ómir súrý uzaqtyǵyn shamamen 80 jasqa deıin jetkizýdi maqsat etip otyr.