Qytaıda gýmanoıdty robottarǵa arnalǵan «ýnıversıtet» ashyldy

ASTANA.KAZINFORM - Beıjińde gýmanoıdty robottarǵa arnalǵan eń iri oqý orny ashyldy, onda mashınalar eńbek naryǵyna shyqpas buryn praktıkalyq daıyndyqtan ótedi, dep habarlaıdy People's Daily.

Beıjińdegi gýmanoıdty robottardy derektermen qamtamasyz etý ortalyǵy ónerkásipte jáne turmystyq sektorda antropomorfty mashınalardy kommertsııalandyrýdy jedeldetýge arnalǵan. Oqý orny jasandy ıntellekt modelderin oqytýǵa arnalǵan qurylymdyq derekterdiń jetispeýshiligin sheshedi.

Eki qabatty alyp jatqan ortalyq naqty óndiris pen turmys jaǵdaılaryn qaıtalaıdy. Negizgi oqytý modeli - bıiktigi 1,66 metrlik gýmanoıdty Kýafý roboty.

Oqytý baǵdarlamasy tórt negizgi salaǵa bólingen. Onyń ishinde ónerkásiptik óndiris, aqyldy úı júıeleri, qarttarǵa kútim jasaý jáne 5G negizindegi qyzmetter, olar birge 16 mamandandyrylǵan salany qamtıdy.

Oqytý shaǵyn toptarda ótkiziledi, árbir robotqa eki nusqaýshy taǵaıyndalady. 110 mamannan turatyn top mashınalarǵa negizgi daǵdylardy úıretedi. Bir stsenarııdi meńgerý 7-8 kúndi alady. Mysaly, tabany peshke qoıýdy jattyqtyrý úshin robot 1250 qaıtalaý jasaıdy, olardyń árqaısysy úılestirý algorıtmderin jetildirý úshin jazylady.

- Robottar fýnktsıonaldy ıntellektti damytý úshin ártúrli stsenarıılerde qarqyndy oqytylýy kerek. Bul balalardyń qaıtalanatyn jattyǵýlar arqyly júrýdi úırenýine uqsas, - dep atap ótti ortalyq basshysy Chjý Kaı.

Oqytý kezinde jınalǵan derekter júıeli túrde belgilenedi jáne iri kólemdi modelderdi odan ári oqytý úshin tehnologııalyq seriktestermen birlese jasalady. Bul protsess robottardyń fızıkalyq tájirıbesin ártúrli óndiristik platformalarda jappaı masshtabtaýǵa qolaıly algorıtmderge aınaldyrýǵa múmkindik beredi.

Daıyndalǵan mashınalar naqty sektorǵa ıntegratsııalanǵan. Robottar China FAW Group zaýyttarynda, Shenzhen Capital Group kýrerlik qyzmetterinde jumys isteıdi, China Southern Power Grid-ti tekseredi jáne Zhongguancun ınnovatsııalyq platformasynyń qatysýshylarymen keńes beredi.

Qytaıda gýmanoıdty robot toqtaýsyz 106 shaqyrym júrip, Gınnes rekordtar kitabyna engenin jazǵan edik.