Qytaıda gýmanoıd robottardyń jappaı kommertsııalandyrý dáýiri bastalmaq
ASTANA. KAZINFORM — 2025 jylǵy málimetterge sáıkes, álemdegi gýmanoıd robottardy ornatý kóleminiń 80 paıyzdan astamy Qytaıdyń úlesine tıesili, dep habarlaıdy Sınhýa.
19 sáýirde ótken 2026 jylǵy Beijing Yizhuang Half Marathon jarysynda, sondaı-aq gýmanoıd robottar arasyndaǵy jartylaı marafonda qytaılyq Shenzhen Honor Smart Technology Co., Ltd. kompanııasy ázirlegen «Shandıan» («Naızaǵaı») roboty erler arasyndaǵy jartylaı marafon boıynsha álemdik rekordtan da joǵary nátıje kórsetip, máre syzyǵyn birinshi bolyp kesti. Ýaqyt kórsetkishi 50 mınýt 26 sekýnd.
Robot 57 mınýt 20 sekýndtyq álemdik rekordty jańartyp, gýmanoıd robottar jarysynda jańa kórsetkish ornatty. Bul Qytaıdyń gýmanoıd robottar ındýstrııasynyń tehnologııalyq elikteýden jahandyq kóshbasshylyqqa, zerthanalyq deńgeıden naqty qoldaný salasyna ótkeniniń jarqyn mysaly boldy.
19 sáýir kúni shamamen 12 myń adam men 300-den astam gýmanoıd robot jarys jolyna shyqty.
Ereje boıynsha robottar 30 sekýnd aralyqpen bir-birden jiberildi. Nátıjesinde «Naızaǵaı» roboty arnaıy jolaqpen 21 shaqyrym qashyqtyqty 50 mınýt 26 sekýndta júgirip ótip, jeńiske jetti. Onyń eń joǵary jyldamdyǵy sekýndyna 10 metrge jetip, adam sprınterleriniń shegine jaqyndady.
— Bul qytaılyq gýmanoıd robottardyń dınamıkalyq sıpattamalaryndaǵy mańyzdy serpilis, — dedi Beijing Humanoid Robot Innovation Center tehnıkalyq dırektory Tan Tszıan.
Onyń aıtýynsha, 21 shaqyrymdyq jarys robottardyń kórý júıesi, ıntellektýaldy taný qabileti, akkýmýlıator qýaty men dınamıkalyq tepe-teńdigin úlken synaqtan ótkizedi.
Ótken jylmen salystyrǵanda márege jetken robottardyń nátıjeleri aıtarlyqtaı jaqsarǵan.
Avtonomdy turaqtylyq, júrisiniń birqalyptylyǵy jáne algorıtmdik senimdiligi edáýir damyǵan.
Gýmanoıd robottardyń ár qadamynyń artynda Qytaıdyń negizgi komponentter óndirisinen bastap ıntellektýaldy júıeler men keshendi ıntegratsııaǵa deıingi barlyq tizbektegi jetistikteri tur.
Gýmanoıd robottar jasandy ıntellekt, dál mashına jasaý, materıaltaný jáne basqa da salalardyń toǵysqan ónimi retinde jańa sapaly óndirgish kúshterdiń mańyzdy elementi sanalady. Qazirgi tańda Qytaı gýmanoıd robottar ındýstrııasynda álemdik negizgi kúshke aınalyp, damý deńgeıi boıynsha alǵashqy qatardan berik oryn aldy.
2025 jylǵy málimetterge sáıkes, álemdegi gýmanoıd robottardy ornatý kóleminiń 80 paıyzdan astamy Qytaıdyń úlesine tıesili. Qytaı Halyq Respýblıkasynyń Indýstrııa jáne aqparattyq tehnologııalar mınıstrliginiń málimeti boıynsha, 2025 jylǵa qaraı adam tárizdi robottardy shyǵaratyn Qytaı kásiporyndarynyń sany 140-tan asyp, 330-dan astam robot úlgisi shyǵaryldy
Іri tildik modelder men vırtýaldy-realdy oqytýdyń biriktirilgen tehnologııalarynyń arqasynda qytaılyq robottar aldyn ala jazylǵan baǵdarlamalarǵa táýeldilikten arylyp, qozǵalys logıkasyn óz betinshe meńgerip, naqty ýaqytta sheshim qabyldaı bastady.
Unitree Robotics jáne UBTECH sııaqty kompanııalar ázirlegen robottar búginde artqa salto jasaý, 720 gradýsqa aınalý sekildi kúrdeli qozǵalystardy oryndaı alady. Qozǵalystyń turaqtylyǵy men birqalyptylyǵy salanyń ozyq deńgeıine jetken.
Qytaı elektronıka qaýymdastyǵy basqarma tóraıymy Sıýı Sıaolan buǵan deıin qytaılyq gýmanoıd robottar kúrdeli tehnologııalyq máselelerdi sheshý kezeńinen ótip, ındýstrııa kóshbasshysyna aınalǵanyn aıtqan bolatyn. Onyń pikirinshe, endigi mindet — salany damytý men ınnovatsııalyq ekojúıeni jetildirýdi kúsheıtý. Bul Qytaıda ǵana emes, búkil álemde jańa sapaly óndirgish kúshterdiń negizgi qozǵaýshysyna aınalmaq.
Beıjińdegi adamdar men robottar arasyndaǵy jartylaı marafonnan bastap Kóktem merekesine arnalǵan gala-kontserttegi óner kórsetýge deıin, zaýyttardaǵy dál operatsııalardan sheteldik naryqtaǵy suranysqa deıin qytaılyq gýmanoıd robottar «arenadaǵy jarys» kezeńinen «úılerde qoldaný» jáne «zaýyttarda jumys isteý» kezeńine jyldam ótip jatyr.
Tan Tszıan tehnologııalardyń jetilýine qaraı gýmanoıd robottar óndiris pen kúndelikti ómirge tereń ıntegratsııalanyp, óńdeý ónerkásibiniń tıimdiligin arttyrýda, qoǵamdyq qyzmetterdi jańǵyrtýda jáne erekshe jaǵdaılarda jumys atqarýda mańyzdy ról atqaratynyn aıtty.
2026 jyl salada «gýmanoıd robottardy jappaı óndirý men kommertsııalandyrýdyń alǵashqy jyly» retinde qarastyrylyp otyr. Jaqynda jarııalanǵan salalyq baıandamalarǵa sáıkes, 2026 jyldyń ekinshi jartysynda álemdik gýmanoıd robottar ındýstrııasy kommertsııalandyrýdyń sheshýshi kezeńine ótedi. Qytaılyq kompanııalar kommertsııalyq qoldaný baǵyttaryn belsendi aıqyndap, óndiristik qýatty arttyrýda. Sarapshylar 2026 jyly óndiris kólemi aıtarlyqtaı ósedi dep kútedi.
Aıta ketelik Beıjińde gýmanoıdty robot jartylaı marafonda adamnan jyldam júgirgeni týraly jazǵan edik.
