Qytaıda gýmanoıd robottardyń kólemi artady
ASTANA. KAZINFORM - Unitree Robotics kompanııasy gýmanoıd robottarynyń jetkizilimin arttyrýdy josparlap otyr, dep habarlaıdy AZERTADJ.
Qytaı kompanııasy Unitree Robotics adamǵa uqsas robottarynyń jańa Jyl meıramyna arnalǵan gala-kontserttegi kórinisi arqyly halyqaralyq tanymaldyqqa ıe bolyp, jetkizilim kólemin edáýir kóbeıtýdi jáne gýmanoıdtyq robototehnıka segmentindegi kóshbasshylyq pozıtsııasyn nyǵaıtýdy kózdep otyr.
Unitree Robotics bas dırektory Van Sınsın bıyl kompanııa adamǵa uqsas 20 myń robot jetkizýdi josparlap otyrǵanyn atap ótti. Bul 2025 jylmen salystyrǵanda 5,5 myńǵa kóp.
Hanchjoýda ázirlengen robottar kúrdeli jaýyngerlik óner elementterin, batýtta sekirip, salto aınalyp, jyldam júgire alady, bul sońǵy 12 aıdaǵy tehnologııalyq jetistikti kórsetedi.
Keıbir elementter, sonyń ishinde G1 modeli robottarynyń kýng-fý kórsetilimderi tolyq avtonomdy rejımde oryndalǵan. Sonymen qatar H2 adamǵa uqsas robot pen B2-W robot-ıtter de paıdalanyldy. Batýttaǵy maksımaldy sekirý bıiktigi 3 metrge, al júgirý jyldamdyǵy sekýndyna 4 metrge (shamamen saǵatyna 14 km) jetti.
Qytaılyq tehnologııalyq analıtık Patrık Chjan robottar naqty jaǵdaıda kóp shekteýlerge tap bolatynyn, alaıda sahnalyq kórsetilimder tehnologııalardyń qazirgi jetilý deńgeıin kórneki túrde kórsetetinin atap ótti.
Van Sınsın óndiris salasynyń negizgi mindeti — gýmanoıd robottaryn naqty jaǵdaıda engizý bolyp qala beretinin aıtty. Sol sebepti Unitree avtonomdy basqarý júıelerin qurý úshin naqty ıntellekt salasynda jumys isteıtin komandalarmen yntymaqtastyq ornatýda.
Zertteý kompanııasy Omdia málimetinshe, ótken jyly Unitree adamǵa uqsas 5,5 myńnan astam robot jetkizip, Tesla, Figure AI jáne Agility Robotics sııaqty AQSh básekelesteriniń jetkizilimderin artta qaldyrǵan. Investorlar Unitree-di Qytaıdaǵy gýmanoıdtyq robototehnıka sektoryn damytýdyń negizgi ındıkatory retinde qarastyryp, jetkizý tizbegindegi kompanııalarǵa qyzyǵýshylyq artty.
Aıta ketelik Qytaıda robottar gala-kontsert ótkizgeni týraly jazǵan edik.