Qytaıda «granflıýenser» tanymaldyǵy artyp keledi
ASTANA. KAZINFORM — Qytaıda «granflıýenserler» dep atalatyn egde jastaǵy blogerlerdiń tanymaldyǵy artyp kele jatyr. Olar áleýmettik jelide saıahat, sán, baǵbandyq pen kúndelikti tynys-tirshiligi jaıly vıdeolarmen bólisedi. Sarapshylardyń aıtýynsha, bul úrdis aǵa býyn ókilderiniń ózine degen senimin nyǵaıtýǵa kómektesip, zeınetkerlerdiń qajettilikterine baǵyttalǵan «kúmis ekonomıkasynyń» damýyna septigin tıgizýde, dep habarlaıdy Kazinform China Daily basylymyna silteme jasap.
Internet juldyzdarynyń jańa býyny
Qartaıý — ómirge degen qyzyǵýshylyqty joǵaltý emes. Qytaıda egde jastaǵy adamdar tsıfrlyq keńistikti belsendi ıgerip, artyp kele jatqan ınternet-ekonomıkanyń bir bóligine aınalyp keledi.
Olardyń biri — 80 jastaǵy ataqty bloger Beıhaı ata. Ol minsiz kostıýmderi men tártipti ómir salty arqyly aýdıtorııanyń júregin jaýlap aldy. 2018 jyldan beri ol ulymen birge Douyin áleýmettik jelisinde (qytaılyq TikTok nusqasy) akkaýnt júrgizip keledi. Olardyń otbasylyq saıahattar, názik stıl jáne kúndelikti ómirdiń jyly sátteri týraly vıdeolary 15,2 mıllıonnan astam jazylýshynyń basyn qosyp, shamamen 300 mıllıon laık jınaǵan.
Anhoı ólkesiniń turǵyny, 56 jastaǵy zeınetker Lıý Tsınmeı Beıhaı atanyń úlgisi shabyt bergenin aıtyp, zeınetkerlik ómir, gúl ósirý, bı jáne saıahat týraly qysqasha vıdeolar túsirýge uıytqy bolǵanyn moıyndaıdy.
@grandpa.is.here #CapCut #grandpa #fyp #fashion ♬ Banana (feat. Shaggy) [DJ FLe - Minisiren Remix] - Conkarah
Qarttardyń tsıfrlyq belsendiligi
Qytaıdyń Qartaıý máselelerin zertteý ortalyǵynyń zertteýshisi ıAn Sıaotsı «granflıýenserler» sanynyń artýyn qarttardyń óz oılaryn ashyq jetkizgisi kelýimen baılanystyrady. Olar úshin ınternet qarym-qatynas pen ózin-ózi tanytý alańyna aınaldy.
Qytaı ınternet-aqparat ortalyǵynyń derekterine sáıkes, elde 1,12 mıllıardtan astam ınternet qoldanýshysy bar. Onyń ishinde 161 mıllıon adam 60 jastan asqan.
ıAn Sıaotsıdiń aıtýynsha, qart zeınetker blogerlerdiń tanymaldylyǵy – qarttyq pen ómirge qushtar, stıldi adamdardyń beınesi arasyndaǵy aıqyn aıyrmashylyqpen túsindiriledi. Olar qarttyq — bul ómirdiń sónýi emes, jańa múmkindikter kezeńi ekenin kórsetip júr.
Syn-tegeýirinder men qaterler
Jańa qubylystyń tanymaldyǵy artqan saıyn belgili bir qıyndyqtar da paıda bola bastady.
Sarapshylar ınternettegi shamadan tys belsendilik egde jastaǵy adamdarǵa shabyt qana emes, sonymen qatar psıhologııalyq júkteme ákelýi múmkin ekenin eskertip otyr.
— Egde jastaǵy blogerler vıdeo túsirýdi «qaralym úshin jarys» emes ómirdi ártaraptandyrýdyń bir tásili retinde qabyldaýy mańyzdy. Dástúrli qolóner, baǵbandyq nemese aspazdyq týraly tájirıbe men danalyqty shyǵarmashylyq rolıkter jasaý arqyly bólisken jón sııaqty, — deıdi ıAn Sıaotsı.
Tsıfrlyq ortaǵa beıimdelý ońaı mindet emes. Kóptegen qart adam vıdeony montajdaý, júkteý sııaqty tehnıkalyq qıyndyqtarǵa tap bolyp, pikirlerge jaýap berýge kelgendi irkilip jatady.
«Kúmis ekonomıkasynyń» keleshegi
QHR Azamattyq ister mınıstrliginiń deregine qaraǵanda, 2024 jyldyń sońyna qaraı Qytaıda 60 jastan asqan 310 mıllıonnan astam adam ómir súrdi. Bul el halqynyń shamamen 22%-yn quraıdy. 2035 jylǵa qaraı bul kórsetkish 30 paıyzdan asady dep kútiledi.
Osy aýdıtorııanyń úlken áleýetin eskere otyryp, 2024 jyldyń basynda Qytaı úkimeti «kúmis ekonomıkasyn» damytý jónindegi nusqaýlyq usyndy. Qujatta zeınetkerlerge arnalǵan telehıkaıalar, mýzyka, qysqa vıdeolardy qosa alǵandaǵy kontentti belsendi túrde damytý, sondaı-aq egde býynnyń qajettilikterine saı qyzmetter men tehnologııalardy jetildirý qajettigi atap ótilgen.
Beıjiń kommýnıkatsııa ýnıversıtetiniń Televıdenıe mektebi dekanynyń orynbasary E Mınjýı «kúmis ekonomıkasynyń» damýy jaǵymdy úrdis dep sanaıdy. Degenmen, qatelikke jol bermeý mańyzdy ekenine nazar aýdartady.
Onyń atap ótýinshe, qarttardyń tsıfrlyq qaýipsizdik pen derbes derekterdi qorǵaý máselelerin bilýi kerektigin aıtady. Internet qarttarǵa qýanysh ákelýi múmkin. Alaıda bul saqtyqty jáne otbasy men qoǵam tarapynan qoldaýdy qajet etedi.
Qytaı Áleýmettik qamsyzdandyrý qaýymdastyǵynyń esebine sáıkes, «kúmis ekonomıka» naryǵynyń kólemi búginde 7 trıllıon ıýanǵa (shamamen 984 mlrd dollar) jetken. Bul eldiń JІÓ-niń 6 paıyzyn quraıdy. 2035 jylǵa qaraı bul kórsetkish 30 trln ıýanǵa (4,2 trln dollar) deıin ulǵaıýy yqtımal.